«Kantabrian beste maila bat dago. Haiek profesionalak dira. Guk nahikoa lan izango dugu azken fasean sartzen». Potesen jokatuko da bihar Arrasto Txakurren Espainiako Txapelketa, eta bertan izango da Arkaitz Etxarri hernaniarra, beste 33 lagunekin batera. Bigarren urtez segidan sailkatu da Epeleko ehiztari gazte hau Espainiakora, Gipuzkoakoan bigarren eginda, eta Euskadikoan hirugarren.
Lixto, bi urteko txakur bizia
Saguesoa da Lixto, eta bi urterekin, dezente jarria omen dago txapelketara. «Iaz urte bat zeukan, eta hala ere lan polita egin zuen. Aurten, oraindik gehiago jarri da. Nafarroako Txapelketan adibidez, kanpotarren saririk onena irabazi genuen, eta sasoi puntu onean iritsi gara».
Zakurrak egin beharreko lanak dira, arrastoa ahalik eta azkarren bilatu, zaunka batekin adierazi, arrastoari ahalik eta zuzenena segi, zaunkaka eta azkar, baina presarik gabe. Horrela ez du erraza ematen, eta lehian pentsa zer izango den. «Lixto ondo moldatzen da, baina biziegia da, eta lasai joan behar du; azkar, baina lasai». Saguesoa eta Grifoia dira bi txakur arraza ezagunenak, arrasto zakurretan, eta Kantabrian nahastuta ere ibiltzen omen dituzte.
Horrez gain, ez omen du zerikusirik txapelketak eta ehizak. «Txapelketan ona izanagatik, ez du esan nahi ehizean ona denik. Ez du zer ikusirik. Mendian dena aldatzen da».
Txapelketa, bi fasetan
Lehendabiziko fasean 34 ehiztari izango dira, eta horietatik 14 pasako dira finalera.