Muxutruk, lau hilabetetan 300dik gora lagun aritu dira Urumea eta Oria ibaia garbitzen. Urgarden taldeak deituta, 9 auzolan egin dira, eta hurrengoa larunbatean dute. Zati batzuk garbitu dituzte, baina beste zati batzuk oso zikin segitzen dute. Horregatik, larunbatean Urumeako azken garbiketa honetarako dei egin diete hernaniar guztiei. Ergobin egin dute garbiketarako hitzordua, 09:30etan, eta handik etorriko dira Floridaraino, Zubiondoraino. Eraman beharrekoa: bota egokiak eta lanerako gogoa; norbaitek piragua edo ontziak eraman nahi baditu ere, ongi etorriak izango dira azaldu dute. Garbiketa bukatuta Hernaniko hondartzan, bazkalduko dute, Karabelen.
Gero eta jende gehiago
Zazpi lagunek hasi zuten Urgarden taldea, eta pixkanaka jendetza biltzen ari zaie. Udara ostean berriro ekingo diote ibaia garbitzeari.