Hernanik bosgarren txapela nahi du, eta horrela Donostia harrapatu eta bigarren lekuan egongo litzateke, Herriarteko Txapelketa gehien irabazi duten herrien artean, 16 aldiz irabazi duen Azkoitiaren atzetik. Ez du ordea, lan makala izango, aurrean Berrobi baitauka, lehenengo aldiz finalean sartu den taldea. «Herri osoa» joango da Berrobi animatzera, eta horregatik, gradetan egon liteke biharko final haundiko klabea. Hernaniko zalea ordea, beti nagusitu izan da joku horretan.
Hiru partidu, hiru final
Festa giro ederra izango da bihar Atano IIIa pelotalekuan. Egun haundietako giroa, 10:30etatik aurrera. Hiru partidu jokatuko dituzte, eta ez dago ezer jakinik. Itxura batera, kadeteetan Berrobi da faborito; eta jubenil eta nagusietan Hernani.
Iker Loiarte eta Hodei Noble, sorpresaren bila
Kadeteetan du Berrobik bikote gogorrena, Zubiria-Erauskin. Beraiek dira faborito, baina Loiartek eta Noblek Donostiarren kontra erakutsi zuten, gai direla edozeini sustoa emateko.
Iñigo Urkizu eta Aritz Murgiondo, taktikaren bila
Jubenilen partiduan faboritoak, berez, hernaniarrak dira. Alberdi eta Elustondok ez dute bikote orekatuegia osatzen; Elustondo atzelariak jokatzen du ia erabat, eta horregatik, taktikan asmatu behar zaie. Urkizu eta Murgiondo hernaniarrek horixe bilatuko dute, finaleko presioari aldegin, eta buruarekin jokatzea.
Ojuel eta Gorrotxategi, ‘bizitza asegurua’
Nagusien partidura berdinduta iritsiz gero, bikote seguruena dauka Hernanik, oso gutxitan failatzen duena. Euskal Herriko egungo txapeldunak dira, eta Irazusta eta Altunari irabazteko gai. Dena dela, bi pelotari berrobitarrek ere ez dute joko pattala: Altuna onenetakoa da, maila honetan, eta Irazustak famarik ez badu ere, ofizio dezentekoa erakutsi du aurten.
Hernaniko zaleari deia
Hernaniko pelota elkarteak dei egin die herritarrei, biharko finalean Hernani animatzera joateko, Atano IIIa pelotalekura. «Konfiantza guztia daukagu pelotariekin, eta zaleekin. Ez digute inoiz hutsik egin», dio Rufino Rekaldek, Hernaniko arduradunak.
Sarrerak salgai daude oraindik, Irizar tabernan.
Finala twitterren, Kronikaren bidez
Hernaniko Kronika ere Atano IIIean izango da, eta finalari jarraituko dio twitter bidez. Erabiliko duen hashtag-a: #herriarteko.