karabelek hiri antolamendu berria izango du; beste hitz batzuetan, zubi, errotonda, etxebizitza, errepide, jolas parke eta aparkaleku berriak izango ditu. Udalak planaren diseinua onartu zuen ostiralean, Gobernu Batzordean. Obren hasiera noiz izango den zehaztu gabe dago oraindik; hala ere, Oraune enpresak bere web orrian publikatu duenez, 2012ko bigarren seihilekoan hasiko dira obrak, hau da, datozen hilabeteetan. Plan guztia batera egingo dela ere azaldu dute, hau da, hasieratik bukaerara arte segidan egingo dela dena.
Zubi berria,
uholdeak ebitatzeko
Uholdeen kontrako neurri gisa, Karabelgo zubi zaharra bota egingo dute, berria egiteko. Zubi berria oraingoa baino gorago egingo da; ez du hankarik izango, horrek ibaiaren ur emaria trabatu egiten baitu. Zubi berri hau Karabelen egingo den obra guztiaren ardatza izango da, ondoren egingo diren etxebizitzek berau finantziatzen lagunduko baitute.
Zubi zaharrarekin batera, honen ondoan ezker-eskubi dauden hiru etxe zaharrak ere, botatzea aurreikusten da urbanizazio plan honetan.
Errotonda berria,
norabideak antolatzeko
Zubi berria gurutzatuta, auzorako sarrera-irteerak eta Porturako bidea antolatuko dituen errotonda egingo dute. Auzoaren sarrera, egungo bera izango da. Errotondatik tren geltokirainokoa.
Karabeleko kale nagusia berriz, auzoa erdi-erditik gurutzatzen duena, itxi egingo dute bizilagunentzat, eta egun dagoen bidegorria mantenduko dute.
Beraz, Zubipe eta oraingo etxebizitzen artetik pasatzen den errepidea izango da auzotik irteteko erabiliko dena. Luzatu egingo dute, hor dagoen baserri atzeko zelaietatik, eta errotonda berriarekin izango du konexioa.
Hortaz, errepideek kanpoaldetik zeharkatuko dute auzoa: errotonda berritik Renfe geltoki ingurura; hemendik, Zubipe ondoko errepidera, eta azken honetatik, errotondara buelta.
186 etxebizitza berri
Karabeleko planak 186 etxebizitza berri ere biltzen ditu. Horietatik 36 Babes Ofizialekoak izango dira; 36 tasatuak; eta gainontzeko 114 etxebizitzak salmenta librekoak izango dira. Etxebizitza guzti hauek auzoko sarreran dagoen parkinean eta ondoko zelaiean egingo dituzte.
Plaza, parke, aparkaleku...
Etxe berrien inguruak plaza, umeentzako parkea eta lokal komertzialak izango ditu, besteak beste. Aparkalekuei dagokienean, inguru guztian egingo dira. Horrez gain, Zubipe ondoan dagoen parkina haunditu egingo da, ondoan dagoen futbol zelai txikia (kanpo gorria deiturikoa) hartuta. Azken obra hau Udalaren esku geratu da, eta noiz egingo den zehaztu gabe dago. Azkenik, aparkaleku honen ondoan futbol zelai berria egingo du promotorak, auzoarentzat.