IRISTEAR da egun haundia, Karmen Eguna, Kaxkoko bizilagunentzat. Egun bateko festa izaten da, baina gogotik ospatzen dute, goizetik gauera. Kaxko Elkarteak antolatzen du festa eguna, eta aurten ere, ez dira ekitaldiak faltako. Eguerdiko 12:00etan hasiko da festa ofizialki, baina aurretik izango dira bi ekitaldi. Goizeko 09:00etan egingo duten Mezarekin, Kaxkoko hildako bizilagunak gogoratuko dituzte; meza Agustinetan. Ondoren, dianak esnatuko ditu batzuk, eta alaituko ditu besteak; 09:30etatik aurrera ibiliko dira kalean gora eta behera.
Alkate berria eta
omenaldia, festa hasieran
Bixente Zaraguetak pasako dio Alkate testigua Juani Lucas Aranbururi. 12:00etan botako dute festen hasierako suziria, eta orduan hartuko du hitza Alkate berriak. Urtebeteko ardura eta ohorea izango du Juani Lucasek, Kaxkoko bizilagunak gobernatzekoa.
Kaxko Elkarteak hainbat arrazoi izan ditu kontuan Alkate berria aukeratzeko, horien artean, Lucasek urte guzti hauetan izan duen kolaborazioa eta dedikazioa: «laguntzeko prest izan da beti: festak antolatzen, bizilagunei behar dutenean laguntzen...». Juani Lucas Kardaberaz kaleko 26garren zenbakian bizi da egun; baina Alkate makila 40garren zenbakian hartuko du, bere jaiotetxean.
Eguneko beste protagonista Josefina Catedra Galdon izango da, festetako omendua. Tejidos Hernandez mertzeria izan zuen bere garaian Kardaberaz kalean, Deportivo parean. Senarra eta biek egiten zuten lana bertan, eta bikote oso ezaguna ziren Kaxkoan. Senarra orain urte batzuk hil zen, eta astelehenean Josefina Catedrak jasoko du «ondo merezitako omenaldia».
Bi ekitaldiak bukatuta, Kaxko Elkarteak auzoko balkoi apainduak aztertuko ditu, irabazlea aukeratzeko asmoarekin. Bide batez, bizilagunak animatu nahi dituzte balkoiak apaintzera eta Kaxkoko banderak jartzera.
Bazkaria eta jokoak,
arratsaldean
Urtean zehar ez dute elkartzeko aukera askorik izaten bizilagunek, eta Karmen Eguneko bazkaria garrantzitsua izaten da. 14:00etan hasiko da Plaza Berrin, eta txartelak salgai daude, 15 euroan, Aralar eta Oindin; Migel Lujanbiok ere, baditu.
Bazkalostean, jokoen txanda izango da. Kardaberaz kalean, karta jokoan ibiliko dira emakume edo bikote mistoak; Kale Nagusian; toka, igel eta bote jokoetan; eta txikienak, Gaztelu puzgarrietan, Plaza Berrin. Hauentzat gainera, txokolatada antolatu dute, 18:00etan.
Saribanaketa eta sardin jatea, azken txanpan
Eguneko lehiaketa eta joko guztien sariak 20:00etan banatuko dituzte, Plaza Berrin. Ondoren, eta festak bukatzeko, herritar gehien biltzen dituen ekitaldia izango da: sardin jatea. Plaza Berrin izango da, eta sardinak momentuan egingo dituzte; 20:00etatik 22:00etara.
Bazkari edo afari bat nahi?
Errifak ere ari dira saltzen, festen antolatzaileak. Euro baten truke 10 zenbaki ematen dituzte. Saria: birentzako bazkari edo afaria, asteburu batean. Errifak Migel Lujanbiok ditu salgai.
09:00 Meza Agustinetan
09:30 Diana
12:00 Txupinazoa
- Alkatea: Juani Lucas
- Omendua: Josefina Catedra
- Balkoi lehiaketa
- Trikitixa Kaxkoan zehar
14:00 Herri Bazkaria Plaza Berrin
16:30 Karta jokoa Kardaberazen
16:30 Igel, Toka eta Bote jokoak, Kale Nagusian
17:00-19:00 Puzgarriak Plaza Berrin
18:00 Txokolatada
20:00 Sari Banakaeta
20:00-22:00 Sardin jatea
22:30 Txupinazoa