LAUGARREN urtez jarraian, Herriarteko finala jokatuko du Hernanik. Ez da nolanahiko marka. Nagusi dira pelotalekuan, garbi geratu zen atzokoan. Donostiaren kontra jokatu zuten bueltako partidua, finalerdietakoa, eta ondo gailendu ziren. Kadetetako partiduan, espero bezala, donostiarrak izan ziren nagusi, 22-10. Hernanik ondo eutsi zien partidu erdira arte, baina beraiek nagusi ziren, eta hala erakutsi zuten azken zatian. Jubeniletan, kosta egin zitzaion Hernaniri partiduan sartzea. Urduritasuna tarteko, donostiarrentzat izan ziren aurreneko tantuak. Handik aurrera, kolorerik ez. Hernani nagusitu zen aurrean eta atzean, eta 11-22 irabazi zuten. Arrieta eta Gorrotxategik ere, erakustaldia eman zuten seniorretan. Biziago, kolpe eta joko gehiagorekin jokatu zuten. Era guztietako tantuak egin zituzten: sakez, atzean, txokoan, zabalean... 5-22 irabazi eta finalerako pasea eskuratu zuten.
Berrobi, arerio gogorra
Hernani da egungo txapelduna, eta Berrobiren kontra defendatu beharko du txapela. Ez du arerio erraza izango. Beraiek nagusi dira kadetetan; baina jubeniletan eta seniorretan, aukera haundia du Hernanik. Finala datorren igandean, Atanon, 10:30etan hasita.