lurraldebus txartela duenak trena hartu nahi badu, hauxe egin dezake bihartik aurrera: estaziora edo apeaderora joan, han propio jarri duten makinan txartela pasa eta trenera. Iristean ere makinan pasa behar da txartela. Aldiriko trenak edo cercanias deitzen zaienak hartu ahal izango ditu Lurraldebus txartelarekin, dirurik erabili beharrik gabe.
Otsailaren 20an hitzarmena sinatu zuten Diputazioak eta Renfek, eta horri esker lortu da Lurraldebusekin trena ordaintzea. Dena dela, orain arte lehiatilan bakarrik erosi zitekeen billetea Lurraldebusekin; bihartik, makinetan ere erosi ahal izango da.
Hitzarmen honetatik kanpora geratu dira talde berezien Lurraldebus txartela daukatenak.
Tarifak Renfek jarri
Oraingoz ez dago aldaketarik treneko tarifetan. Renfek jartzen dituen tarifak ordaindu beharko dira. Tarifak bateratzeko asmoa badago, baina hori 2013an izango da. Lurraldebus txartelarekin ordaindutakoa, gero Diputazioak ordainduko dio Renferi. Konpentsazioko kalkuluak hilero egingo dira, eta Diputazioak hilero ordainduko du.
Txartel bakarra 2013an, Eusko Tren, Renfe eta autobusetan
Urratsak ematen ari diren arren, saltorik haundiena 2013an emango du Lurraldebus txartelak. Gipuzkoako Diputazioa lanean ari da, txartel bakarrarekin garraiobide publiko guztiak erabili ahal izateko, eta garraiobide bat baino gehiago hartzen dituenak abantaila ekonomikoak izan ditzan.