«Partiduak espero bezala jokatzen badira, eta pelotazle hernaniarrak animatzera gerturatzen badira, posible da Hernani beste behin herriarteko finalean egotea», hala dio Rufino Rekaldek. Ez litzateke edonolako marka: pasea lortuz gero, Hernanik laugarren finala jokatuko luke jarraian, eta 10garrena azken 14 urteetan.
Aldea badute, eta beraz, faborito dira. Hernanik partidu bat eta 26 tantuko bentajarekin jokatuko du gaur, Atano IIIa pelotalekuan. Donostiako taldea izango du aurrean, 16:30etatik aurrera.
Bi aldaketa:
kadetetan eta seniorretan
Kiroldegian joan den asteburuan jokatu zuten partidutik aldaketak egin ditu Oiaga entrenatzaileak.
Kadeteetan, Suharri Rodriguezek jokatuko du, Hodei Noblek eskutako mina baitu; aurrelaria mantendu egingo da, Loiarte. Hauek izango dute aurkari gogorrena gaurkoan, maila honetan, bikote donostiarra onenetarikoa baita.
Urkizu eta Murgiondok defendatuko dituzte Hernaniren koloreak jubeniletan, beste behin. Joaneko partiduan bezala jokatzen badute, hernaniarrek ez dute arazo haundirik izango donostiarrak gainditzeko.
Eta seniorretan, ohiko rotazioa medio, Arrietak jokatuko du, Aitor Gorrotxategi atzean duela. Hernaniarrek hasieratik aurrea hartzea klabea izango da, nahiz eta partidua irabazteko faborito nagusiak izan.