Gaurko eguna ere Dianarekin hasiko da eta ondoren, Sokamuturra eta Axeri Dantza ere ez dira faltako. Egun berezia izango da, berriz, Goiz Eguzki jubilatu etxeko kideentzat. Herri jolasak eta gimnasia erakustaldia antolatu dituzte eta ondoren sari banaketa eta luntxa.
Musika ezberdina eta euskal dantza garaikidea, batera
Gauerako ikuskizun ederra prestatu dute Hernaniko hainbat gaztek, Atsegindegin. Musika mota ezberdina eta euskal dantza eta dantza garaikidea nahastuko dituzte Lanbro artean ikuskizunean. Xabi Agirrezabala kideak Kronikari azaldu dionez, Hernani Institutuko ekitaldi batean jotzeko prestatu zuten eta aurrera jarraitzea pentsatu eta San Joanetan jotzea erabaki dute. 18 urteko gazteak dira, Hernani eta Urnietakoak, orokorrean. 9 musikari eta 7 dantzari, ordu eta erdiz publikoa bereganatzeko prest.
Bertso saioa, arratsaldean
Gipuzkoako Txapelketako lau finalistak ariko dira bertsotan arratsaldean: A. Sarriegi (txapelduna), B. Gaztelumendi, A. Martin eta I. Apalategi.
Tonbolako azken eguna
Thailandiako tribuetako neskek josten ikasi dezaten dirua lortzeko tonbola dago Tilosetan eta gaur da azken eguna.