San Joanetako aurreneko ipurdikoak eta maxkuri astinduak jasoko dituzte gaur askok eta askok, lehenengo Sokamuturra eta Axeri Dantza izango baitira. Sokamuturra 07:30etan izango da, Gudarien plazan eta Axeri Dantza 09:00etan hasiko da. Bihar, asteartean eta asteazkenean ere izango dira, ordu berean. Asteazkeneko Axeri Dantza, ohi bezala, mixtoa izango da.
Udalaren gomendioak
Sokamuturrerako, Udalak hainbat gomendio eman ditu: ibilbidearen atariak barrutik giltzatuta egotea eta bizilagunak kalera ez ateratzea ekitaldiak irauten duen bitartean. Horrez gain, gogorarazi du 16 urtetik beherakoek ezin dutela parte hartu.