Urtero bezala, Udaleko Babes Zibileko Sailak eskatu du, arauak errespetatzea San Joan jaiak ahalik eta ondoen bizitzeko. Babes Zibilak emandako arauak San Joan suaren eta Sokamuturraren inguruan dira. San Joan suari dagokionean, jakinarazi dute, auzoetan suak egiteko arauak eta gomendioak biltzen dituen Bandoa Udaletxeko arkupeetan dagoela jarria. Gudarien plazako suari lotuta, berriz, azaldu dute, Kaxkoko eraikin askok egurrezko estrukturak edota egurrezko elementu asko dituztela eta sua zabaltzeko arrisku haundia dagoela. Hori dela eta, suaren inguruan egiten diren ekitaldiak bukatu ondoren (23:00), udal langileek sua itzaliko dute eta geratuko diren hondakinak jasoko dituzte. Horretaz gain, ikusleentzako hainbat gomendio eman dituzte: ez bota ezer sutara eta errespetatu ikusleentzako eremua; hau da, ez sartu hesien bidez mugatutako segurtasun eremuan.
Sokamuturrean, 16 urte beherakoek debekatua
Ekainaren 25ean, 26an eta 27an Sokamuturra egingo da goizeko 07:30etik 09:00etara. Ibilbidea, honakoa: Gudarien plaza, Kardaberaz kalea, Felipe Sagarna Zapa kalea eta Kale Nagusia. Ibilbidearen atariak barrutik giltzatuta egotea eskatzen du Babes Zibilak eta bizilagunak kalera ez ateratzea ekitaldiak irauten duen bitartean. Horrez gain, gogorarazi du 16 urtetik beherakoek ezin dutela Sokamuturrean parte hartu.
Batzuk ondo pasatzeko beste batzuek lan
Pertsona askok beraien jaiei uko egiten diete gehiengoak ahalik eta modurik onenean bizitzeko jaiak. Hori dela eta, Udalak gogoan izan nahi ditu San Joan jaietan herritarren segurtasuna bermatzeaz arduratzen diren langile guztiak: udaltzainak, suhiltzaileak, udaleko zerbitzuetako langileak, DYAko kideak eta abar.