Hernaniko San Joan jaiak hasteko 11 egun besterik ez dira geratzen. Hastear dira, beraz, herriko festarik garrantzitsuenak eta urtero egin ohi den bezala, horiek iragartzeko Preludioa edo Iragarpen kontzertua izango da. Urteko kontzerturik garrantzitsuena dena larunbatean izango da eta bestetan baino San Joan kutsu eta hernaniar izaera gehiago dakar. Izan ere, ohiko taldeez gain, herriko beste hiru taldek ere hartuko dute parte kontzertuan: Hernasax saxofoi taldeak, Kantaita taldeko kide batzuk eta Akelarreko beste batzuk.
Hiru taldeek
beren ekarpena
Hiru talde gonbidatuek euren ekarpena egingo dute kontzertuan. Hernasax saxofoi taldeak bi abesti eskainiko ditu txistulariekin batera. Kantaita taldeko kideek, berriz, talde osoak San Joan bezperan, suaren inguruan eskaintzen duen errituala interpretatuko dute. Eta Akelarreko kideek San Joan bezperan egiten duten Sorgin dantzaz gozatzeko aukera eskainiko dute.
Ikuskizuna gaueko 22:30etan hasiko da. Berez Plazan izan ohi da, baina eguraldiaren eraginez iaz Atsegindegin egin zen eta aurten oraindik ez dute zehaztu non izango den.
Preludio Txikia, ostiralean
Kontzertu nagusia larunbatean izango bada ere, San Joan jaiak iragartzen lehenengoak Preludio Txikiko partaideak izango dira. Emanaldia ostiralean izango da 19:00etan. Lekua zehazteko dago.