San Antonio Jaien barruan, Ereñotzuko Mendi Lasterketa antolatu zuten iaz lehenengo aldiz eta sekulako arrakasta izan zuen. Aurtengo edizioak ere bide beretik jarraitu du eta parte hartzaile kupoa bete egin da; 200 korrikalarikoa, hain zuzen. Beraz, 200 bat lagun inguru Oindin gora eta behera korrika ikusi ahal izango dira gaur. Goizeko 10:00etan abiatuko dira Ereñotzuko plazatik eta Oindi igo eta jaitsi ostean plazan bukatuko dute lasterketa. Lasterketaren epe muga 2 ordu eta erdikoa izango da. Dortsalak jasotzeko, parte hartzaileek 09:00etatik 09:30ak bitartean azaldu beharko dute.
13km eta 630 metroko
desnibela
Ibilbideari dagokionez, parte hartzaileak Ereñotzuko plazatik hasita Latxe eta Pikoagatik barrena Zuluetako gainaraino joango dira. Bertatik kaxkoz kaxko, Oindiko tontorreraino egin beharko dute eta handik behera, inguruko mendi bailarak eta itsasoa ikusiz. Usategietako baserriraino iritsiko dira eta jarraian Fagollagara. Azkenik, bidegorri berritik barrena Ereñotzuko plazan helmugaratuko dira. Denera 13 km-ko ibilbidea izango da eta desnibel metatua 630 metrokoa da. Kontrol puntu nagusia Oindiko tontorrean izango da.
Lasterketan zehar jan-edari postuak izango dira platano eta laranjekin. Eta bukatzean, pintxoak eta salda izango dituzte parte hartzaileek.
Sariak guztientzat
Sari nagusiak lehenengo 3 emakumezkoentzat eta 3 gizonezkoentzat izango dira, baina parte hartzaile guztiek izango dute opariren bat: kamiseta, opari sorpresa eta 10 euroko bonoa Ibai Mendi kirol dendan gastatzeko. Horrez gain, zozketa mordoa egingo da Hernaniko denda eta tabernek oparitutako gauzekin (afariak, gaztak, txuletak, pastelak, edariak, arropak...).
Ez deskalifikatzeko,
aholkuak
Antolatzaileek jakinarazi dutenez, lurrera paper, botila edo beste edozer zikinkeria botatzea deskalifikatzeko arrazoia izan liteke. Ibilbidetik ateraz gero, lasterketatik kanpo geratuko da korrikalaria.
Iazko lehenengo
ereñotzuarra, bertan
Iaz, lehenengo hernaniarra Zigor Iturrieta izan zen gizonezkoetan (sailkapen orokorrean bigarren geratu zen); emakumezkoetan berriz, Ines Arreitunandia. Eta Ereñotzuko bizkorrena Iñaki Gorrotxategi izan zen. Gaur ere bertan izango da.
Datuak:
Ordua: 10:00
Mota: Mendi Lasterketa.
Distantzia: 13 Km
Irteera: Ereñotzuko plaza.
Kontrol puntu nagusia: Oindiko tontorra.
Helmuga: Ereñotzuko plaza.
Desnibel metatua: 630 metro.
Iraupena: Gehienez 2 ordu eta erdi.
Dutxa zerbitzua: Ereñotzuko eskolako dutxak.