Asteburuan zehar antolatutako ekintzen helburua izango da, auzoko eta auzotik kanpoko ahalik eta jende gehien bildu eta elkarrekin ongi pasatzea, urteroko moduan. Aurtengo egitarauak ordea badu berezitasun bat Laiotz taldearen kontzertuaren artean gazteek ekintza bat antolatu baitute, sekretua den ekintza. Garai batean auzokideek euren artean umore jokoak egiten zituzten, ipurdi lehiaketa besteak beste. Ohitura bereziak mandendu asmoz, eta auzoan ongi pasatzeko helburua izanik gazteek aurtengoan ekintza berezi bat antolatu dute gaur gauerako. «Jendea animatzea da garrantzitsuena guretzako, eta festetara hurbiltzen diren guztiek oso ongi pasatzeko ekintza izango dela badakigu; musikaz lagunduta ongi pasatzeko unea izango da», dio ekintza honen antolatzaileetako bat den Ekhiñe Arrutik.
Giro ona nagusi
Giro ona, giro herrikoia sortzen dela dio Arrutik. Auzoko jende guztia biltzen da jaiegun hauetan eta guztiek harreman ona izanik, giro polita sortzen dela azpimarratzen du: «Urtean asteburu bat izaten da eta guztiak animatzen gara eta elkarren artean ongi pasatzen dugu», dio gazteak. Arrutik dio orokorrean auzoko jendea egoten dela Osiñagako jaietan, horiei bideratuta dagoelako batez ere. Baina, larunbatetan esaterako, jende asko inguratzen da egoten diren ekintzetara, azken finean, herri kirolek, eta sagardo eta bakailu dastaketak adibidez jendea erakartzen dutelako. Larunbat gaua ere inguruko jendea biltzeko unea izaten da, Laiotz taldearekin dantza egin eta ongi pasatzeko asmoz haur, gazte eta helduak biltzen baitira kasu honetan ere.
Guztientzat antolatutako ekintzak
Auzokoentzako gehienbat, guztiak elkartzen diren unea izaten omen da polita: «agian igande goizekoa izaten da politena», dio Arrutik. Igande goizetan auzoko helduei omenaldia egiten zaie eta horrez gain auzoko bazkaria egiten da. Azken hori jendeari asko gustatzen zaio, auzokide guztiak biltzen direlako, gainera bertsolariak ere aritzen dira eta horrek giroa pizten omen du beti. Beraz, igandea izaten da bereziki auzoko haur, gazte eta helduak biltzeko eguna, eta agian horrek egiten du berezi eguna. Kanpotik hurbiltzen direnentzat larunbat arratsaldea izaten da interesgarria, azken finean, herri kirolak egoten direlako eta ikusmina sortzen dutelako. Igande arratsaldeetan ere gauza bera gertatzen da, zaldi dema egiten delako auzoan. Beraz, esan liteke giro ederrean ongi pasatzeko aukera eskaintzen dutela Osiñagako jaiek, eta gehienbat auzokideentzako bideratuta egon arren, hurbiltzen den guztiek ondo pasatzeko helburuarekin egiten dituztela.