TOP esperientzia, pakete turistikoa, ibilbide laburrak tren berdean eta bisita gidatuak hirigune turistikoan; eskaintza turistiko horiek egin dira aurten aurreneko aldiz, Txotx denboraldiaren barruan. Urtarrilaren 28tik apirilaren 29ra izan da eskaintza horiez disfrutatzeko aukera. Horiez gain, Turismo informazio gunea ere jarri dute 15 asteburu horietan, Biteri kultur etxearen aurrean. Txotx denboraldia eta eskaintza bukatuta, proiektuan parte hartu dutenak elkartu dira aste honetan, balorazioa egitera: Hernaniko Udaleko turismo arloa, Donostialdea turismogunea eta Hernaniko beste hanbat sagardogile.
Emaitzekin pozik
Udalak prentsa oharra bidali du Kronikara, bilera horretan egindako balorazioarekin. Azaldu dute, eskaintza turistikoaren balorazio orokorra oso positiboa izan dela: «erabiltzaile kopurua egokia izan da; lanean aritu den gidak oso iritzi ona azaldu du; top esperientzian eta pakete turistikoan parte hartu duten sagardogileen iritzi orokorra ere, baikorra da; eta oso emaitza onak azaldu dituzte esperientzian edo pakete turistikoan parte hartu duten 4 taldetako hiruk, gogobetetze-inkestan».
Udaletik gogorarazi nahi dute, eguraldiak ez duela gehiegi lagundu txotx denboraldiak iraun duen 15 asteburuetan: «otsailaren 1ean esaterako, elurra egin zuen eta apirila osoan egun bakarra izan da euririk egin ez duena».
San Markoko furgoneta ez da gehiago etorriko
Hernanin zehar, sukaldeko olioa biltzeko 10 makina jarri dira, herritarrek gertuago eta ordutegirik gabe izan dezaten birziklatzeko aukera. Hori horrela, Udalak gogoratu nahi du San Markoko furgoneta ez dela gehiago etorriko Hernanira: «beraz, ezingo da Urbieta kaleko zuhaitz ondoan olio poterik utzi».
Bestalde, gogoratu nahi dute baita ere, aste honetan ari direla etxez etxe olioa berziklatzeko poteak banatzen, eta horiek bakarrik erabili daitezkeela makinetan: «behin betea dagoenean, makinan sartu, pixka bat itxaron, eta pote garbi bat itzuliko du».
Erabiltzaile kopurua
Informazio gunea: 196
Tren berdea: 238
Top esperientzia: 21
Pakete turistikoa: 22
Bisita gidatua: 63