Espainiako Gobernuak Zerbitzu Publikoetan iragarri dituen murrizketen aurka lanuzteak izan ziren atzo Hernanin. Udaleko zerbitzu guztietako langileek bat egin zuten deialdiarekin, eta baita Osasun zentroko eta hezkuntzako zenbait langilek ere. 11:00etatik 13:00etara egin zen lanuztea, eta kontzentrazioak egin zituzten Atsegindegi parean (Kiroldegiko espaloian), Osasun Zentroan, Laubidietan eta Udal Euskaltegian. Atzoko lan uzte deia LAB eta ESK sindikatuek egin zuten, eta Udalaren kasuan, ELAk ere bat egin zuen deialdiarekin. LAB sindikatuak azaldu duenez, atzoko deialdiarekin exijitzen dute: «atzera botatzea azken urteetako murrizketak eta Zerbitzu Publikoak suntsitzeko neurriak; Hego Euskal Herriak marko normatibo propioa izatea, halako eskusartzeak ekiditeko; Hego Euskal Herriko instituzioek ez aplikatzea hemen erabaki eta negoziatu ez diren neurriak; osasuna, hezkuntza eta babes sozialerako aurrekontuak nabarmen haunditzea; eta politika fiskal eta ekitatiboa eta progresiboa bermatzea, hau da, gehien dutenek gehiago ordaintzea».
Kontzentrazioa, Donostian
ELA eta STEE/EILAS sindikatuek deituta, manifestazioa egin zen Donostian; eta egun osoan zehar, mobilizazioak egin zituzten lan zentroetan.