santa Barbarako klaustroan irakasle talde bat elkartzen hasi da, Rajoyk hezkuntzan eta osasunean iragarri dituen murrizketak aztertu eta hauei aurre egiteko asmoarekin. Murrizketa horiek gelditu, eta orain arte aplikatutakoak atzera botatzea da euren helburuetako bat. Dituzten asmoen inguruan hasi dira guraso eta ikasleak informatzen, lortu nahi baitute hauek inplikatzea eta indarra guztiek elkarrekin egitea. Sindikatuen laguntza behar dutela ere azaldu dute, «bidea elkarrekin egiteko».
Arazoa, gizartearentzat
Arazo laboralaz gain, gizartearena ere badela azaldu diote Kronikari, «murrizketa hauen ondorioz, kalitatea jaitsi egingo baita: atentzioa jaitsi egingo da, aukerak ez dira berdinak izango guztientzat. Aniztasunak eskatzen du irakasle gehiago izatea, leku gehiago... eta murrizketek kontrakoa bilatzen dute».
«Ez gara Eusko Jaurlaritzak dioenaz fido»
Eusko Jaurlaritzak jakinarazi du ez dituela Rajoyk iragarritako murrizketak beteko, baina irakasle taldeak azaldu duenez, ez dira fido: «diskurtsoa ez da argia, ez baitute esaten nola egingo duten. Batetik, errekurtsoa jarriko dute, baina Konstituzionalak sententzia ematerako 6 urte pasako dira. Eta bitartean, zer? Tarte horretan Espainiako Gobernuak bai ala bai aplikatu egin behar dela esaten badu, zer egingo dute? Ez dute ezer garbi esan eta horrek mesfidantza sotzen du».
Azpimarratu dute, talde hauek presio gisa ari direla sortzen, irakaslegoa adi egon dadin. Gainera, azaldu dute beste 45 zentrurekin jarri direla harremanetan, indarrak batzeko asmoarekin: «presio talde bat sortu nahi da, irakasleak ez gaudela ados erakutsi eta elkarrekin mobilizatzeko».
Aplikatu nahi diren murrizketak:
LH eta DBH
- Ikasleen ratioa %20a igo
- Bajan dagoen irakaslearen ordezkoa 20 egunetara hasiko da lanean
-Irakasleen klase orduak igo
Unibertsitatean
- Irakasleen dedikazio orduak igo
- Unibertsitateko tasak igo
Aplikatutakoak:
- Ordezko irakasleak baja astebete luzatzen denean hasten dira
- Bajan dagoen irakasleak murrizketak soldatan
- Errelebo kontratua kendu
- 60 urtetik gorakoek klaseak 6 ordu gutxiago emateko eskubidea eta jubilazioa kendu
- Soldataren izozketa