Hernaniko preso politikoen eta iheslarien aldeko Elkartasun Astea gaur bukatuko da Elkartasun Egunarekin. Egun potoloa gaur da beraz, eta preso eta iheslarien eskubideak aldarrikatzeko hainbat ekintza izango dira. Horien artean nabarmentzekoak dira eguerdiko 12:00etan grabatuko den Lip Duba eta 13:00etan izango den Goazen Plazara ekimena. Euskal Herriko txoko guztietan izango da azken ekimen hori. Aurten, Herrira Mugimenduak hartu du beregain Elkartasun Astea antolatzeko ardura eta herritarrei dei egiten die parte hartu dezaten eta kaleak eta plazak bete ditzaten, kartzelak hustutzeko.
Hernaniko 30 bat talderekin eta herritarrekin Lip Duba
Kaxkoan
Preso eta iheslarien aldeko Lip Duba gaur grabatuko da, 12:00etatik aurrera. Kaxkoan barrena izango da: Txili, Kardaberaz Kalea, Plaza Berri, Kale Nagusia, Karkaba, Tiloseta eta Plaza. Bertan, Hernaniko 30 talde inguruk eta herritarrek hartuko dute parte. Grabazioari 13:00etan Plazan emango zaio bukaera Goazen Plazara edo Kaleak bete ekimenarekin bat eginez.
Herri krosa, bazkaria eta kontzertuak
Elkartasun ekintzak goizetik hasiko dira. Urtero bezala, 10:30etan herri krosa izango da Plazatik abiatuta (iazko argazkien bideo montajea ikusgai www.kronika.net helbidean).
Urteroko bazkaria ere antolatu dute 15:00etan. Ondoren, enkantea eta jolasak izango dira. Eta eguna bukatzeko, kontzertuak antolatu dituzte Kontrakantxa gaztetxean.
EGITARAUA:
10:30etan, Herri Krosa Plazatik.
12:00etan, Lip Dub grabaketa, Kaxkoan zehar.
13:00etan, Goazen Plazara.
15:00etan, herri bazkaria.
Ondoren, enkantea eta jolasak.
22:00etan, kontzertuak Kontrakantxa gaztetxean.
KALEAK BT
Tantaz tanta pausoz pauso
jantziko dugu kale oro
orain euri gero ozeano
uholderen bat badator
eskuz esku orpoz orpo
gogoa orain martxan dago
ez hadi begira jarri
eta plazara hator.
Kartzelak hustu
kaleak betetzeko
ez dugu orain
denborarik galtzeko
kaleak bete
kartzelak hustutzeko
zulo asko dugu
oraindik asetzeko.
Errepidez errepide
dabilkigu maitasuna
une orotan kalez kale
orain non dago beldurra
txingurriak garaituko du
mapak ez ditugu behar
gaur ez hadi lotsatu
eta atera plazara.
Kartzelak...
Kaleak bete
kartzelak hustutzeko,
herria bustitzen da
askatasunaren bidean
denbora garrantzitsua da
gure alde irabazteko,
aurrera pauso bat
ekintza bakoitzan,
bahiturik ditugun
senideak etxeratzeko
herritarrak gara
herritik datorren uholdea
eskakizunen zaparrada
umeak,helduak,gazteak aiton-amonak,
herri bat gara
elkartasunez goaz aurrera,
herri ekimenen
itsasora,
lapurtu ziguten askatasuna
ekar dezagun Euskal Herrira
Kartzelak hustu...