Pasa den astelehenean, Hirigitzan eta Ingurumen Batzordearen aurrean, aurkeztu zuen Hamaikabatek bere proposamena. «Auzoan dagoen aparkatzeko arazoari, gehiegi luzatu denari, amaiera emateko, Lizeaga kaleko ezker aldea bateriazko aparkaleku batean egokitzea» proposatu zuen alderdiak. Batzordean ordea, Bilduren kontrako bozkak, PSE-EEren abstentzioa eta EAJren babesa izan zuen proposamenak. Ondorioz, «Lizeagarako proposatutako aparkaleku eredua Bilduk baztertu izana tamalgarritzat» jo du Iñaki Arratibelek, Hamaikabateko kideak, prentsa-ohar baten bidez.
15.000 euro, nahikoak
Arratibelek dio, ulergaitza dela Udal Gobernua bateriazko aparkaleku baten proiektua idaztearen aurka egotea. Izan ere, proiektua idazteko 15.000 euro nahikoak izango direla uste baitute. Proiektua 2013an gauzatzea aurreikusten du Hamaikabatek.
Era berean, San Antonio Paradorreko zelaia aparkaleku gisa egokitzeko garaia dela aldarrikatu dute.
Premiazko beharra
Hamaikabatek adierazi du, inbertsio txiki batekin konponbidea emango litzaiokeela, auzoa urte luzeetan pairatzen ari den arazoari.
Horrexegatik, premiazko behar hau asetzeko, berriro ere Lizeaga kaleko ezker aldea bateriazko aparkaleku batean egokitzearen alde egingo dutela nabarmendu dute.