Elkartasun astea bete-betean da. Herenegun, herri antzerkia izan zen Biterin, eta atzo berriz, hitzaldia. Gaurko egunerako ere, ekintza bat baino gehiago antolatu da. Batetik, larunbatean grabatuko den Lip Duberako entsaioa egingo da gaur, eta bestetik, bertso afaria, Santa Barbara elkartean.
Entsaioa, 20:00etan
Larunbatean grabatuko den Lip Duba jendetsua izatea espero da. Antolatzaileek azaldutakoaren arabera, grabazioaren ardura izango duenak, 65 kg inguruko pisua eraman beharko du soinean. Beraz, grabazio bakarra, edo gehienez jota ere, bi egingo dira. Horrexegatik, entsaiora azaltzea garrantzitsua dela azpimarratu dute. Entsaioa gaur izango da, 20:00etan. Talde bakoitzak dagokion lekuan kokatuta egon beharko du ordu horretarako. Antolatzaileek eskaera egin dute, talde bakoitzeko pare bat ordezkari agertu daitezen, guztia ondo lotuta uzteko.
Bertso afaria
Gaur bertan, bertso afaria ere egingo da. Iluntzeko 20:00etan izango da, Santa Barbara elkartean.
Enkanterako gauzak uzteko epea, zabalik
Larunbata izango da asteko egunik haundiena. Enkantea egun horretan egingo da, bazkalostean, eta oraindik zabalik dago enkanterako gauzak emateko epea. Hasiera batean asteartean amaitzen zen gauzak emateko epea, baina antolatzaileek jakinarazi dute, biltoki gisa plazan jarritako lokalak zabalik jarraituko duela larunbatera arte. Bada ez bada, telefono bat ere jarri dute, zerbait utzi nahi duenak antolatzaileekin harremanetan jar dadin: 635 006 275.
Larunbata, egun haundia Asteko egunik garrantzitsuena larunbata izango da, ekintza ugari antolatu baitira. Goizeko 10:30etan, presoen aldeko herri krossa egingo da. 12:00etan, Lip Duba grabatuko da, eta 13:00etan plazan emango zaio amaiera grabazioari, Plazak Bete ekimenarekin bat eginez. Herri bazkaria 15:00etan izango da. Jarraian, enkantea eta ur jolasak egingo dira, eta eguna amaitzeko, kontzertuak izango dira Gaztetxean, 22:00etan.