herri krossek gero eta harrera haundiagoa dute euskaldunen artean, eta Umore Ona elkarteko kideek, beste hainbat eragilerekin batera, Goizuetako Krossa antolatzea erabaki dute. Bi aste barru izango da, maiatzaren 27an hain zuzen, eta azaldu dutenez, helburuetako bat da aspaldian Goizuetan zegoen krossa egiteko ohitura berreskuratzea.
Partehartzea irekia, guztientzat
Krossa irekia izatea da beste helburuetako bat, hau da, edonork izatea parte hartzeko aukera. Hori horrela, txiki, gazte zein helduek eman dezakete izena, Goizuetakoak izan, hala kanpokoak izan.
Txandei dagokienean, txikienak goizeko 10:30etan aterako dira; eta helduak ordu erdi beranduagoa, 11:00etan alegia.
Garai bateko zirkuitua berreskuratu dute
Helduek garai bateko zirkuitua egin beharko dute. Ibilbide honek herria inguratzen du. Plazatik atera eta bertan bukatzen da; bide erdia errepidetik egiten da, eta beste erdia mendiko senda batzuetatik.
Probak 9 kilometroko luzeera du, baina zirkuitua 3 kilometrokoa da. Beraz, partehartzaileek hiru buelta eman beharko dizkiete.
Izena eman nahi dutenek Interneten dute aukera
Krossean, gehienez, 120 lagunek har dezakete parte. Nahi dutenek, aldez aurretik eman dezakete izena www.kirolprobak.com web orrian. Izena ematearen kostua 10 eurokoa da inguruko herrietako korrikalarientzat. Goizuetarrek 8 euro ordaindu beharko dituzte parte hartzeko.
Aldez aurretik izena emanda, partehartzaile kupoa ez bada betetzen, egunean bertan ere izango da aukera, lasterketa hasi aurretik, Umore Ona elkartearen soziedadean (hasi baino 30 minutu lehenagora arte). Bertan izena ematen dutenek 15 euro ordaindu beharko dituzte proban parte hartzeagatik.
Dorsalak egunean bertan banatuko dira
Antolatzaileek jakinarazi dutenez, proban parte hartzeko dorsalak egunean bertan banatuko dituzte. Goizeko 10:00etatik aurrera izango dira eskuragarri Umore Ona elkartean. Horrez gain, arropa jasotzeko gunea ere izango da, Plazan. Eta lasterketa bukatu ostean, dutxatzeko aukera egongo da Goizuetako eskolan.
Sariak,
aurreneko hiruentzat
Gizon zein emakumeentzat izango dira sariak. Aurrenekoak txapela, arkumea eta ardo botila irabaziko ditu; bigarrenak, bi txuleta eta ardo botila; eta hirugarrenak baserriko oilaskoa eta ardo botila. Goizuetako aurreneko gizon eta emakumeak ere izango du saria: oroigarria, arkumea eta ardo botila. Horrez gain, partehartzaile guztiek kamiseta teknika bat jasoko dute; eta zozketak ere, izango dira.