sei hilabete pasa dira Urumeako urek ibaiaren inguru guztia txikitu zutenetik. Urumearen aldeko bizilagunek, tartean, Hernaniko errugbi, futbol eta arraun elkarteak, 6 hilabete hauetako balantzea egin dute, eta informazioa prentsa ohar bidez bidali dute Hernaniko Kronikara. Oharrean diote, ordutik erakunde-arteko bi bilera egin direla, eta bizilagunen plataformak azkenekoan hartu zuela parte: «azken bilera horretan lehentasuna zuten 5 eginbeharrak zehaztu ziren, eta horien jarraipena egiteko hitzordu berri bat egin zen, maiatzaren 6an». Azaldu dutenez, oraindik ez diete aurreikusita zegoen bilera horretarako deirik egin: «espero dugu data berriro ez atzeratzea. Hurrengo bilera aurretik gai ordena zehaztea nahi genuke, guztiok gaiak aurretik lantzeko aukera izan dezagun. Horrez gain, eskatzen dugu hurrengo batzarrean erakundeek aurkeztea azarotik ona egindako lanen balantzea. Eta azkenik, egutegi finko bat adostu nahi dugu, aurrerantzean egin beharreko lanak, arin eta egoki egin daitezen».
«Ez dira lehenetsitako proiektuekin hasi»
Erakundeek 2007ko azterketan aurreikusitako 18 eginbeharretatik 5 lehenetsi izana, gizartea lasaitu eta beraien burua babesteko aitzakia besterik ez dela izan diote oharrean: «izan ere, ez dago zehaztutako eperik lanekin hasteko, eta horren adibidea da Martuteneko kasua. Proiektua osatua omen dago, zenbat aldeketa baino ez omen ditu behar, baina horretarako urtebeteko epe luzea eman dute. Badakigu prozesu luzea izango dela, batez ere egungo ekonomia kontuan izanda, eta hori aitzakitzat hartuko dutela uste dugu, berehalako neurriak ez hartzeko».
«Ibaia garbitzeko gauza ere ez dira»
Ur agentziaren utzikeriaren lekuko, ibaia era guztietako ondakin eta enborrez betea dagoela diote oharrean: «lan errazekin ere ez dira hasi. Ibaia zikin eta oztopoz betea badago, berriz gertatutuko dira uholdeak. Ez al litzateke errazago luzerako dijoazen proiektu haundiekin hasi beharrean, lan errazekin hastea?».