Bi urte bete ziren asteazkenean Hernanin Atez Ateko sistema martxan jarri zenetik. Herritarrei lorpenak, datuak eta erronkak azaltzeko asmoarekin, hitzaldia antolatu zuen Hernanin Zero Zabor taldeak atzo arratsaldean Biterin. HZZ taldeko bi kidek eta Luis Intxauspe alkateak eman zituzten datuak.
Hernanin 5.522 tona
hondakin jaso ziren 2011n
2011n Atez Atekoak utzi zituen datuak eman zituzten lehendabizi. Udalak emandako datuen arabera, 5.522 tona hondakin jaso ziren Hernanin 2011n; 285 tona inguru biztanleko. Horietatik bereizita 4.407 tona jaso zirela azpimarratu zuten, hau da, hondakinen %79,8. Beste 1.115 tonak berriz, errefusa izan zirela gaineratu zuten.
Azalpenean jakinarazi zutenez, hilabete guztietan antzeko jasotzen da: «ez da aldaketa haundirik izaten. Daturik onenak abuztukoak izan ziren, %82,4 birziklatu baitzen; bajuenak berriz, abendukoak izan ziren, %78,2 birziklatuta».
Organikoa, Atez Ate gehien jasotzen den hondakina
Jasotzen diren hondakinak banaka aztertu zituzten ondoren. Azaldu zutenez, organikoa da gehien jasotzen dena, %34a: «horietatik 1.489 tona atez ate jaso ziren eta 397 tona autokonposta ziren. Errefusa da gehien jasotzen den bigarren hondakina, %20,2a. Kasu honetan, atez ate 720 tona jaso ziren eta kale garbiketetan 393 tona. 2011ko gainerako hondakin kopuruak ondorengoak izan ziren: papera eta kartoia, %14,6a; bestelakoak, hau da, pilak, jardineritza, olioa... %11,4; beirak, %10; eta ontzi arinak, %9».
448 familia gehiagok egiten dute autokonposta
Datuekin jarraituz, azaldu zuten Atez Atekoaren aurretik 182 familiek egiten zutela autokonposta Hernanin, eta orain 630ek egiten dutela. Horiez gain, simaurrerako, olioa egiteko edo txerrijana egiteko erabiltzen duten familiak ere badirela gogoratu zuten, 46 hain zuzen. Hala ere, kanpaina berri baten beharra dagoela azaldu zuten.
Horrez gain, epe motzean bultzatu nahi duten auzolaneko konposta ere aipatu zuten: «lehenengo esperientzia 2012an jarriko dugu martxan, familia asko baitaude interesatuta».
Bestalde, organikoaren kalitateari dagokionean, garbitasuna %99,86koa dela esan zuten.
«Emaitza onak»
2011ko datuak eman ostean, bi urtetako balantzea azaldu zuten. Orokorrean, emaitzak onak direla zioten, eta errefusa %20tik jaisteko aukera zegoela ere gaineratu zuten.
Herritarren harrerari dagokionean adierazi zuten, sistema ondo txertatu dela familien egunerokotasunean: «normaltasunean sartu da eta onarpen soziala oso zabala du».
Atez Atekoak sortutako lanpostuak ere, ekarri zituzten gogora. Azaldu zuten, hondakin kudeaketan 13 lanpostu sortu dituela Hernanin: «kudeaketa eredu aurrerazalea dauka Hernanik. Hondakinen inguruan, herritarren heziketa hobetu da».
«Hondakin gutxiago
sortzen da»
Ingurumena eta osasun politikak kontuan izanda, azpimarratu zuten 2008an 5.219 tona eraman zituela Hernanik bertederora; eta 2011n 1.115: «hondakin gutxiago sortzen da; batetik, krisiak eraginda; eta bestetik, herritarrek hobeto kontsumitzen dutelako. Hernaniarrok ohartzen gara gure ahalegina inportantea izan dela Gipuzkoan errauste plantarik egin ez dadin».
«Kontsumo arduratsuan urratsak eman dira»
Bi urte hauetan egin diren kanpainak ere, aipatu zituzten: arrainarentzako tuperrak, pixoihal berrerabilgarriak, plastikozko poltsak, esne makina, komertzioetan granelean saltzea, bigarren eskuko dendak, baserritar eta kaletarren arteko kontsumo taldeak... Guzti hauek kontsumo arduratsuaren alde emandako urratsak direla gogoratu zuten.
Hernani, eredu
Atez Atekoaren arloan, Hernani eredu erakargarria dela ere, esan zuten: «Gipuzkoako herri askotatik datoz bisitan. Eztabaida Gipuzkoara zabalduta, orain, oso ezberdin ikusten da Hernanin hasieran izandako polemika. Mundu mailako Zero Waste mugimendua ere fijatu da gure herrian».
Aurrera begira hobetzekoak
Bukatzeko, 2012 hasierako aurrerapausoetako bat Garbigunea izan zela azaldu zuten. Eta etorkizunera begira, hobetu beharreko hainbat gauza badaudela ere esan zuten: «kanpainatan kontrol gehiago, zenbait gune hobeto kontrolatu, larrialdi guneak hobetu...».