Gipuzkoako beste hainbat herrietan bezala, Hernanin ere langile langabetuen elkartea sortzeko aurreneko pausua eman dute. Atzo eguerdian egin zuen aurreneko deialdia Oreretako Langabetuen elkarteak, eta 20 lagun inguru elkartu ziren Tilosetan. Oreretako elkarteak bilatzen du Hernaniko langabetuak aktibatzea, eta aurrerantzean, elkarte edo asanblada bat sortuta, maiztasun batekin elkartzea.
Hernanin,
1.100 langabetu inguru
Lanbideren datuen arabera, Hernanin 1.100 langabetu inguru daude, eta Oreretako elkarteak azaldu zuenez, guztiek elkartuta egin behar dute indarra: «beharrezkoa da Hernanin ere, langabetuak elkartzea, kaleak hartzea, arazo bat dagoela azaleratzea, eta dekalogo edo manifestu bat egitea.
Inguruko herrietan astean behin elkartzen direla azaldu du elkarteak; Urnietan esaterako, asteazkenetan elkartzen dira, eta hori litzateke Hernanin eman beharreko pausua.
Herritako taldeez gain, gaineratu zuten Gipuzkoa mailan ere badela langabetuen elkartea. Hauek hilabetean behin elkartzen direla azaldu zuten.
Manifestuan,
besteak beste, eskaerak
Hernaniko taldea osatuko balitz, aurreneko pausua, manifestu bat egitea litzateke. Oreretako elkarteak azaldu zuenez, besteak beste, egin beharreko eskaerak hauek lirateke: «etxerik gabe utzi dituztenekin erabateko elkartasuna eta babesa adieraztea; Estatuan aplikatzen ari diren neurriak Euskadin ez aplikatzea; Hego Euskal Herriko langile langabetuak elkartu eta aktibatzea; zenbat langabetu dagoen jakitea, hau da, zenbat emakume, zenbat gizon, zenbat gazte, adin-tarteak...; sindikatuei beraien lana egin dezatela exijitzea; Udalei lan sozialean inbertitzea exijitzea, eta baita ere herriko jendea kontratatzea exijitzea; infraestruktura haundien aurka azaltzea, hala nola, superportua, AHT...; eliza eta militarrei ematean zaien diru partidaren aurka egotea, eta abar».
Hego Euskal Herriko lau kapitaletan, mobilizazioak
Probintziaka, mobiliziazioak egingo dituzte maiatzean, Hego Euskal Herrian. Aurreneko biak maiatzaren 20an izango dira, Iruñean eta Gasteizen. Handik astebetera, maiatzaren 26an egingo dituzte Donostian eta Bilbon.