Bihartik aurrera, Lurraldebus txartela Renfeko aldiriko tren bidaiak ordaintzeko erabili ahal izango da. Hau da, Renferen leihatiletan tren txartelak erosteko aukera izango da Lurraldebus txartelarekin ordainduta. Uztailaren 1etik aurrera, berriz, makinetan ere erabili ahal izango da. Eta kasu horretan, txartel arrunta eta joan-etorriko txartelaz gain, hileko bonoa ere erosteko aukera izango da. Erabiltzaileek Renferen tarifen arabera ordainduko dute. Talde berezien Lurraldebus txartelak hitzarmenetik kanpo geratu dira. Hitzarmena Gipuzkoako Foru Aldundiak eta Renfek sinatu zuten otsailaren 20an.
2013an txartel bakarra errealitate izateko, lanean
Foru Aldunditik azaldu dutenez, gogor ari dira lanean 2013an txartel bakarra errealitate izan dadin, herritarrek Gipuzkoako garraio publiko guztietan (autobusetan, Eusko Trenen eta Renfen) txartel bakarra erabilita bidaiatu ahal izateko eta garraio bat baino gehiago erabiltzerakoan garraio aldaketak abantaila ekonomikoetan egiteko. «Hori lortzeko lanketa teknikoa ez da erraza eta hilabete batzuk pasako dira, baina bitartean norabide horretan urratsak ematen ari gara».