Maiatzaren lehena da gaur, Langileen Nazioarteko Eguna eta sindikatuek mobilizazioak deitu dituzte. Langileen eskubideen eta lan baldintza duinen aldeko aldarrikapenak kalera aterako dituzte eta herritarrei dei egiten diete parte hartzeko. Manifestazioak hiriburuetan izango dira.
LAB: Bulebarrean, 12:30etan Gora maiatzaren lehena, lotu borrokari! lemapean, LAB sindikatuak Euskal Herriko eskualde ezberdinetan egin ditu deialdiak eta Buruntzaldea eta Donostialdeako herritarrentzat Bulebarrean da hitzordua 12:30etan.
ELA: Bilbon, 12:00etan, ELA sindikatuak Bilbon ospatuko du maiatzaren lehena, Ezinbestez, sindikatua lemapean. 11:30etan, Adolfo Muñoz Txiki Idazkari Nagusiak hitz egingo du Gran Via kalean eta ondoren, 12:00ak aldera, manifestazioa abiatuko da.
CCOO eta UGT: Alderdi Ederren, 12:00etan CCOO eta UGT sindikatuek Erkidegoko hiru hiriburuetan deitu dituzte manifestazioak eta Donostiakoa eguerdiko 12:00etan abiatuko da Alderdi Ederretik. Lema, honakoa: Dena suntsitu nahi dute. Lana, duintasuna, eskubideak!
STEE-EILAS: Donostiako Hezkuntza Delegaritzan, 12:00etan STEE-EILASek Donostiako Hezkuntza Sailaren aurrean egin du deialdia, 12:00etan: Zerbitzu Publikoei eutsi, lan baldintzak errespetatu.
Jubilatu etxean ere, Maiatzak 1 ospatzen
Goiz Eguzki jubilatu etxeko kideek ere, urtero bezala, Langileen Eguna ospatuko dute. Meza, sari banaketa, eskulanen erakusketa eta luntxa antolatu dituzte. Atzo berriz, Goiz Eguzki Abesbatzaren emanaldia izan zen.
EGITARAUA:
09:00etan, hildako bazkideen alde meza, Agustinetan.
11:00etan, udaberriko kale-joku eta karta-jokoetako txapeldun eta txapeldunordeei sariak.
Ondoren, eskulan erakusketa
Amaitzeko, luntxa.