Merkataritza establezimenduak modernizatzeko Eusko Jaurlaritzak diru laguntzak ematen ditu eta Hernaniko Berriak elkarteak jakinarazi duenez, eskaera egiteko epea zabalik dago. Ekainaren 30a da azken eguna.
%15 eta %20ko diru laguntzak
Bi laguntza mota izango dira. Lehenengo taldeko inbertsioen kasuan, hau da, altzariak, errotulazioak, salmenta-lokalak eta eskaparateak, etabar berritzeko, %15eko diru laguntza emango da. Bigarren taldeko inbertsioetarako, berriz, %20ko diru laguntza. Esaterako, informatika aplikazioak (softwarea), informazioa prozesatzeko ekipoak eta osagarriak (eskanerra, inpresora...), kutxa erregistratzaileak, agenda elektronikoak, balantza elektronikoak, etabarrentzako. Proiektu horietarako diru laguntzak jasotzeko, lehenengo taldean 2.000 eurotik gorako inbertsioa egin beharko da eta bigarren taldean 600 eurotik gorakoa. Guztira, 12.000 euroko laguntza izango da, gehienez.
Elkarteko kide izanda, besteak beste, gehiago
Ehuneko horiek 2 puntutan igo daitezke enpresa merkatarien elkarte batekoa bada. Gainera, UNE 175001 kalitate ziurtagiria baldin badu, diru laguntza beste 2 puntu gehiago igoko da. Eta horrez gain, bikaintasun ziurtagiria badu, igoera 3 puntukoa izango da. Guztira, kalitateagatik 5 puntura arte igo ahal izango da laguntza. Eskaera egiteko, Berriakekin harremanetan jarri: 943 33 30 49 edo dinamizador@comercio-gipuzkoa.com.