Urtea borobildu du Hernanik, Alcobendasi 6-8 irabazita

DENBORALDI osoan par­tidu bakarra galduta igo da Hernani Ohorezko Mailara. Urte borobila izateko, ametsa gauzatzea falta zuten triko­loreek, eta atzo lortu zuten. Azken play offa jokatu zuten Madrilgo Las Terrazas ze­laian Alconbendas taldea­ren kontra, eta 6-8 irabazi zuten. Puntu bateko aldea zuen Hernanik, joaneko partidua 19-18 irabazi baitzuen Lan­daren; beraz, atzoko emaitza nahikoa izan zen gorenera igotzeko.

Atsedenaldira, aurretik
Etxeko taldea izan zen nagusi aurreneko zatian, batez ere, aurreko lerroetan. Hala ere, partidua hasi eta berehala, 10garren minutuan aurreratu zituen Genuak hernaniarrak; zigor kolpea sartu, eta 0-3 zen aurretik Hernani.
Alcobendas ez zen ki­kil­du, eta  Ati Fernandezek bi zigor kolpe sartu zituen handik gutxira; 6-3 aurreratu zen Alcobendas markagai­luan.
Aurreneko zatia bukatzear zenean, epaileak Alcobenda­seko bi jokalari bota zituen zelaitik, 10 minuturako. Her­nanik hutsune hori apro­betxatu zuen, eta aurrelariek maulean egin­dako jokaldi luze eta bikainaz baliatu zen Genua entsaioa egiteko. Hala, aurretik joan ziren trikoloreak atse­de­naldira,  6-8.

Hernani nagusi, bigarren zatian
Bihotzekoak emateko modu­ko bigarren zatia jokatu zuten bi taldeek Las Terrazasen. Hernani nagusi izan zen azken 40 minutuetan, eta bitan geratu ziren entsegu-lerrotik metro eskasera. Alconbendas ere saiatu zen, eta 3 minuturen faltan hortxe-hortxe izan zuen entsaioa. Hernanik ordea ondo eutsi zion atzeko lerroetan, eta 6-8ko emaitzarekin bukatu zen partidua.

Zaletuen babesa, beti
Hernanik zaletuen bultzada izan zuen atzo Alcobendasen. Bi autobus gerturatu ziren, eta kotxeetan animatu zi­renak ere, izan ziren. Har­mailetan kolore berdea zen nagusi, eta baita animoetan ere. Arbitroak partidua bu­katutzat eman zuenean, jokalari eta zaleek bat egin zuten zelaian.
Madrilera joaterik izan ez zuten zaleek Hernanitik ani­ma­tu zuten taldea. Internetez ikus­teko aukera zegoen, eta taldeka edo bakarka, guztiek su­fritu zuten azken minutura arte.

Ongi etorria, Plazan
Herriak ongi etorria egin zien jokalariei atzo gauean. Plaza leporaino bete zen, harrera egin, eta jokalariekin lorpena ospatzera.

«Zorionak Udalaren partez»
Hernaniko Udalak errugbi taldea zoriondu nahi du, lortutako garaipenagatik: «Zo­­­­rionak garaipenagatik, eta era berean eskertu, he­rritar oro errugbizalea sen­ti­tuarazi gaituzuelako eta lor­penaren partaide egin gai­tuzuelako. Bultza Hernani!»