Partidu bakar bat galdu gabe irabazi du Hernaniko jubenilen taldeak Euskadiko Liga. Bera-Bera egurtu ondoren, eta Liga bukatzeko partidu baten faltan, Euskadiko Liga irabazi eta Estatuko Txapelketarako sailkatzea lortu zuten.
Estatuko Txapelketan buru-belarri ari dira orain. Lehengo asteburuan Alcobendasen aurka jokatu zuten Landaren. Indartsu aritu ziren hernaniarrak, eta zortzina berdindu zuten markagailua.
Gaurkoan, Estatuko Txapelketako bigarren partidua jokatuko dute Andaluziako txapeldunaren aurka.
Ezertxo ere ez, oparitzeko
Alcobendasen aurka jokatu zuten Landaren, Estatuko Txapelketako lehen partidua. Argi utzi zuten jubenilek, ez zutela ezertxo ere oparitzeko asmorik.
Markagailua zortzina berdindu zuten, eta partidu bakar bat bera ere galdu gabe, aurrera jarraitzen dute hernaniarrek.
Txapelketako hurrengo partidua gaur jokatuko dute, Sevillaren aurka, La Cartujan, eguerdiko 12:00etan.
Azken hatsa
botatzeko prest
Hernaniko Senior A taldeak ere gaur jokatuko du, denboraldiko azken partidua. Azken hatsa botatzeko prest abiatu dira Madrilera, Ohorezko Mailarako igoera lortzeko azken aukerari ihes egiten ez uzteko asmo irmoarekin.
Goizeko 06:00etan abiatuko dira zaletuen bi autobusak ere. Partidua bertatik bertara ikusteko aukerarik ez duenak berriz, internet bidez, zuzenean ikusi ahal izango du, Kronikako webgunean jarriko dugun loturan, edo www.lasteles.com webgunean. Eguerdiko 12:30etan hasiko da partidua.
Alcobendasi puntu bateko aldea atera zion Hernanik lehengo asteburuan Landaren, 19-18 irabazita. Oraingoan, norgehiagoka honen amaieraraino iritsiko dira.