Elkartrukea antolatu dute Hernani Musika Eskolako abesbatzak eta Begues herri kataluniarreko Ad Libitum abesbatzak. 15 eta 25 urte bitarteko hogeiren bat lagunek osatutako koruak dira biak, eta elkartruke honetako lehen kontzertua Hernanin izango da, gaur iluntzeko 20:00etan, Milagrosan. Gazte kataluniarrak atzo iritsi ziren Hernanira, eta kontzertua emateaz gain, inguruak ezagutzeko ere aprobetxatuko dute bidaia.
Kanturako grina
Gazteak dira, bi koruetako abeslariak.
Ad Libitum 2001ean sortu zen, Begues-eko Montau abesbatzaren barruan. Bertako haur abesbatzan aritutako gazteek osatu zuten koru berria, kantuan jarraitu eta gozatzeko asmoarekin. Jordi Llobet izan zuten lehenengo zuzendaria. Mireia Ibarz ondoren, eta gaur egun, Anna Jacasek zuzentzen ditu.
Hernaniko Musika Eskolan, oinarrizko ikasgaia izaten da abesbatza, hasierako urteetan. Egun ordean, asko dira koruan jarraitzea erabakitzen duten gazteak. Batzuk, 10 urte inguru daramazkite bertan. Hernanin, Garbiñe Orbegozo izan da beti zuzendaria.
Errepertorio anitza
Denetarik kantatzen dute bi abesbatzetako kideek. Alde batetik, musika herrikoia, eta bestetik, abesti garaikideen moldaketak. Beste herrialde batzuetako musika interpretatzea ere gustokoa izaten dute.
Gaurkoan, gazte hernaniarrek Baratze bat, Usaiak, Let Me Fly, Aizu Bandai San eta Goza mi calypso kantatuko dituzte. Ondoren, Begues-eko gazteek, Uso zuria, Piano Man, Singing in the Rain, Memory, Somewhere Over the Rainbow eta Begues és i sera interpretatuko dituzte. Azkenik, denek elkarrekin Nesiponono eta Txoria txori abestuko dituzte.
3 egunetako egonaldia
Atzo iritsi ziren beguestarrak Hernanira. Bertako abesbatzako kideen etxeetan egin dute lo, eta gaur, Hernaniko Kaxkoa eta Gurutzeta sagardotegia ezagutzeko aukera izango dute.
Bihar berriz, Donostian izango dira, Begues-era itzuli aurretik.