Begues herri kataluniarreko Ad Libitum eta Hernani Musika Eskolako abesbatza gazteek elkartruke bat antolatu dute. Talde kataluniarra bihar iritsiko da Hernanira, eta kontzertua emango du igandean, hernaniarrekin batean. Bide batez, gure herria eta inguruak ezagutzeko aprobetxatuko dute egonaldia.
Kontzertua, igandean
Bi koruek bakarka eta elkarrekin kantatuko dute, igandean, 20:00etatik aurrera, Milagrosan.
Hernaniarrek 5 kantu abestuko dituzte lehenik. Ondoren, Ad Libitumen txanda izango da, eta 6 kantu abestuko dituzte, horietako bat euskeraz. Kontzertua amaitzeko, elkarrekin abestuko dituzte bi pieza. Horietako bat, Mikel Laboaren Txoria txori kantu ezaguna izango da.
Inguruak ezagutzen
Abesbatza kataluniarra bihar iritsiko da Hernanira, eta astelehenean itzuliko dira. Hiru egun hauetan, Hernani eta inguruak ezagutzeko aprobetxatuko dute. Alde batetik, Hernaniko Kaxkoa ezagutzeko bisita gidatua izango dute, eta Gurutzeta sagardotegira joango dira ondoren. Astelehenean berriz, Donostian izango dira, etxera itzuli aurretik.