Asteburuko dantza emanaldiez gain, ekintza gehiago antolatu dira aurtengo Dantzari Festaren barruan. Horien artean, aste honetan zehar Biteri kultur etxean ikusgai dagoen XVI. mendeko euskal jantzien erakusketa, eta gaur bertan emango den hitzaldia. Iraultza dantza taldeko Ramon Garcia izango da hizlaria, eta XVI. mendeko euskal jantziak izango ditu mintzagai, arratsaldeko 19:00etatik aurrera, Biterin.
Konkistaren harira
Nafarroako Konkistaren 500. urteurreneko hainbat ospakizun egiten ari dira aurten, Euskal Herri osoan. Hernaniko Dantzari Festan ere, urteurren hori hartu da euskal jantzien erakusketaren eta gaurko hitzaldiaren ardatz.
Horrexegatik, XVI. mendeko jantzien inguruko erakusketa eta hitzaldia antolatu dira aurten. Erakusketa ostiralera arte egongo da zabalik, eta hitzaldia gaur izango da, 19:00etan, Biterin.
Erromeria, agurtzeko
Aurtengo Dantzari Festari agur esateko, erromeria izango da larunbatean. Alkarkideko dantzariek zuzenduko dute erromeria, arratsaldeko 18:30etatik aurrera, Hernaniko kaleetan zehar. Eguraldi txarra eginez gero, Atsegindegin egingo da.