Baratza puntu-puntuan jartzeko, landare mota ugari aukeran

Maiatzean hasiko dira tomatea, piperra, tipula, pepinoa, kalabazina… eta baratza puntu-puntuan jartzeko eta landareak aldatzeko orain da garaia. Hori nabaritu zen osteguneko ferian, landare mota ugari izan ziren aukeran Ibarrako Peña landare eta barazki dendako postuan, esaterako. Dena dela, eguraldi kaxkarraren eraginez jeneroa eta jendea atzeratzen ari dela azaldu dio Piok Kronikari. «Eguraldi ona egin zuenean oraindik goiz zela esaten zuen jendeak tomatea eta aldatzeko, orain garaia iritsi da eta hotz honek ez du laguntzen. Hilabete hau ez da batere laguntzen ari. Euria ona da, udarari begira. Hori bai, egun pare bat egin dezala ateri, lurrari buelta eman eta landareak aldatzeko. Bestela, dena lohituta, ez da posible».

Letxuga, espinaka, azelga, aza…
Ana Agirreren postuan garaiko produktu ekologikoak dau­de salgai. Lasarteko Manttan­gorri produktu ekologikoen dendako postua da. Batez ere, Urnieta, Igeldo eta Anoetatik ekartzen ditu produktuak. Bertako, Euskal Herriko garaiko barazkien berri galdetuta, orain letxuga, espinaka, azelga, tipulina, aza eta baratxuriaren garaia dela dio. «Porrua ere bada oraindik, baina azkenetan da. Ilarra eta baba haundia, berriz, oraindik loretan dira. Pixka bat atzeratzen ari da izan ere, eguzkia behar dute. Patata berria ere hasi da, baina oraindik goiz da». Frutari dagokionez, bertakoa orain kiwia bakarrik duela dio, Bizkaitik ekarria. Marru­bia ere badu garaiko produktuen artean, baina Huelvakoa, «he­men­goa oraindik loretan dago».

Udaberriko lehenengo xixak, Lasaren postuan
Mikel Lasaren postuan udaberriko xixak ere hasi dira sal­tzen. 50 euroan daukate kiloa. Nafarroa aldeko xixak dauzkate eta ostegunean baita Gipuzkoakoak ere, bezperan 6 kg bildu baitzituzten. Herna­nin xixa erosteko hainbesteko joerarik ez dagoela azaldu dute, onddoa hobeto saltzen dela. Onddoa ere badute salgai, Zamorakoa, 35 euro/kg. 

PRODUKTU ETA PREZIOAK

LANDAREAK:

Tipula.................... 2,50 euro/zientoa 

Letxuga................. 1 euro/25 landare

Azelga................... 2 euro/25 landare 

Porrua........................ 3 euro/zientoa 

Tomatea.............. 0,50 euro/landarea 

Piperra................ 0,10 euro/landarea 

Marrubiak............ 0,70 euro/landarea 

Azak..................... 2 euro/25 landare 

Kalabazina.............. 1 euro/3 landare 

Pepinoa.................. 1 euro/3 landare 

Kalabaza................. 1 euro/3 landare 

Berenjena............... 1 euro/3 landare 

Borraja.................. 2 euro/25 landare 

Perrejila...................... 1 euro/dozena 

Alkatxofa................. 1 euro/3 landare 

Brokolia...................... 1 euro/dozena 

Erremolatxa................ 1 euro/dozena 

Hemengo garaiko barazki ekologikoak

Letxuga................................. 1 euro

Haritz ostoa....................... 1,20 euro

Espinaka................................ 4 euro

Azelga............................... 2,50 euro

Porrua........... 1,50 euro/dozena erdia 

Tipulina................................. 1 euro

Baratxuria.............................. 1 euro

Aza................................... 2 euro/kg

*Udaberriko xixa.............. 50 euro/kg