Ohorezko mailara igotzeko bidean, azken aukera du jokoan Hernanik bi asteren bueltan. Madrilgo talderik indartsuena izango du aurrean, Alconbedas. Abantailak ordea, badituzte trikoloreek: batetik, aurreneko partidua Hernanin jokatuko dela, eta irabazi eta aldea ateraz gero, lan erdiak eginak izango dituztela; eta bestetik, Hernanik dena duela irabazteko. Alcobendas ordea, denboraldi oso txarra egitetik dator, eta jokoan maila mantentzea du; galduz gero, jaitsi egingo dira. Partidua eguerdiko 12:30etan jokatuko da eta elkartetik dei egin diete zaleei Landarera gerturatu, eta Hernani animatzeko: «zaletuen babesa oso garrantzitsua da. Bultzada haundia da taldearentzat, eta azken partiduetan grada nahiko apal egon bada ere, gaurkoan dena eman behar dugu, bai zaleok, eta baita guk ere. Hori bai, beti ere, epailea eta aurkaria errespetatuta».
Jubenilek,
konpromiso gogorra
Jubenilek ere, Alcobendasen kontra jokatuko dute gaur. Madrildarrak dira faboritoak, baina Hernanik ez du amore emango. Partidua Landaren, 11:00etan.