Organoa instrumentu berezia da, eta Hernani´n Musik ekimeneko antolatzaileek bazuten kontzertu bat antolatzeko gogoa instrumentu honekin. Gogo hori errealitate bihurtuko dute gaur, Dúo Ara Voce bikotearen kontzertuarekin. San Joan Bataiatzaileko organo zaharra izango du instrumentu Ana Belen Garcia organistak; eta honek lagun, Monika Redondo izango du, biolinarekin. Kontzertua arratsaldeko 19:30etan hasiko da, eta sarrera debalde da.
Biak dira goi mailako musikariak eta egun, Urnietako Lourdes Iriondo musika eskolan egiten dute lana, bakoitzak dagokion espezialitatean. Kontzertu ugari ere, eskainitakoak dira biak. Ikasketak Euskal Herriko, Espainiako eta Europako zentro onenetan egin dituzte, eta irakasleak ere, ez dituzte nolanahikoak izan.
Gaurko kontzertuan, zazpi abesti eskainiko dituzte. Aurrenekoa eta azkenekoa Ana Belen Garciak joko ditu, bakarka. Tarteko bostak, aldiz, elkarrekin joko dituzte. Abestiak, hauek: Toccata prima; Sonla nª 23 `La Folia´; O for the wings of a dove; Tema con viariaciones Op. 150; Benedictus; Hymn eta Funerailles.
Hernaniko aurreneko organoa, 1657koa
Egungo organoa 1907an eraiki zuen A. Amezuak eta 1997an berritu zuen Alejandro Usabiagak. Hernanik organista haundiak izan ditu: J. Zubimendi, M. Yaben...
San Joan Bataiatzailea parrokian aurreneko organoa 1657an eraiki zuten, D. Mariana Olaberriak bere testamentuan utzitako 500 dukadori esker; hala diote artxibo zaharrek. Jacinto del Riok egin zuen aurreneko organoa.
Simon Artozqui,
aurreneko organista
Parrokiko aurreneko organista Simon Artozqui izan zen. Lau urte aritu zen lan horretan, eta berak hala eskatuta, sei urtez luzatu zioten kontratua. 10 urtetan Hernaniko organista izan ostean, kontratua bukatzear zuen, Hernaniko alkateak eta erregidoreak kontratu bat sinatu baitzuten Alonso de Amitesaroberekin.
Elizako kabildoa ez zetorren bat erabaki horrekin ordea, eta auzitara eraman zuten. Auziak kostu haundia izatea espero zuten, eta erresoluzioa urruti ikusten zutela kontuan izanda, elkartzea erabaki zuten. Hala, bi aldeek adostu zuten beste urtebetez Simon de Artozqui izatea organista, eta ondoren, Alonso de Amitesarobek hartzea erreleboa.
Organista ilustreen herria
Egun dagoen organoa 1907an egin zuen A. Amezuak, eta ordutik, berritu ere egin dute: 1997an, Alejandro Usabiagak.
Organoaren tradizio luze horri helduta, Hernani organista haundiak izandakoa da: J. Zubimendi, M. Yaben... Gaurko kontzertua emango duen artista, ez da hernaniarra, baina bai organista ilustrea. Beraz, antolatzaileek dioten moduan, instrumentu baliotsu hau entzuteko aukera izango da, goi mailako organista baten eskutik.