Bi liburu aurkeztuko dituzte hilabete honetan, Zapa kalean dagoen Ikatza Liburugunean. Eta lehenengo aurkezpena datorren ostegunean izango da, hau da, hilaren 19an. Breve historia del anarquismo vasco izeneko liburua aurkeztuko du Jtx. Estebaranz egileak berak. Estebaranzek liburuan azaltzen du euskal anarkismoaren sorrera eta izan duen eboluzioa XIXgarren mendetik gaur eguneraino. Garai gogorrak biltzen ditu: II Errepublika eta gerra, ondorengo hamarkadetako borrokak, porrota, frankismoa, demokrazia berrira egokitzea eta borroka berrien sorrera. Liburuaren bidez egileak hainbat eztabaida korapilatsuren oinarriak argitu nahi izan ditu, esaterako, euskal nazionalismoaren eta anarkismoaren arteko lotura eta emakumeen papera burujabetzaren prozesuan. Aurkezpena 19:00etan hasiko da eta berarekin batera, irudiak proiektatuko dituzte.
Iruñeako emakumeen kartzelari buruzko liburua
Apirilaren 26an aurkeztuko dute bigarren liburua: Mujeres en prisión. Salhaketa Nafarroa elkarteak Iruñeako emakumeen kartzelaren gainean egindako lana biltzen da liburuan. Hiru zati ditu liburuak: lehenengoa azterketa juridikoari dagokio; bigarrena inkestetan bildutako informazioari; eta hirugarrrenak bertan egondako 12 emakumeren bizipenak biltzen ditu. Aurkezpena 19:00etan izango da.
Liburugunea asteartero, zabalik
Ikatza Liburugunea asteartero dago zabalik arratsaldeko 18:00etatik 21:00etara. Ikatza Liburugunea, gune autogestionatua da eta gai politiko-sozialei buruzko hainbat material daude bertan. Liburutegiak eta bideotekak mailegu zerbitzua dute eta horrez gain, artxibo txiki bat eta materialak daude. Gune honetan, liburuen aurkezpenak, hitzaldiak, tailerrak... antolatzen dira eta liburugunetik gonbitea luzatzen diete herritarrei proposamenak egiteko.