Tolosak nahi bezain emaitza ona ez, baina maila haundia

Pasa den martxoaren 29tik apirilaren 1era bitarte, Itsaso Tolosa igerilari hernaniarra (Buruntzaldea IKT) Malagan izan da Espainiako Abso­lutuen Open Txapelketa jo­katzen. Tolosa igandean lehiatu zen 200 bizkar frogan. 2’29’’82ko denbora egin zuen eta 26garren sailkatu zen. Igeriketa taldetik azaldu dutenez, «Tolosak ez zuen nahi bezain emaitza ona lortu, baina bertan ikusitako markek erakutsi dute hernaniarra denborarekin maila haundian ibili daitekeela».

Mundu mailako punta puntako igerilarien artean
Tolosa absolutu mailan lehiatu da, bera baino 5-10 urte zaharragoen artean. Horrez gain, txapelketa hori estatu mailan jokatzen den txapelketarik garrantzitsuena izan da; izan ere, junior mailan Euro­pako Txapelke­tarako sailka­tzeko balio izan du eta absolutu mailan Mundu­ko Txa­pel­keta­ra­ko eta Lon­dre­seko Olinpiar Jokoetara­ko. Hori horrela, bertan izan dira mun­du mailako punta puntako igerilariak: Mireia Belmonte, Clau­dia Dasca, Mercedes Peris, Aschwin Wil­­deboer, Rafa Muñoz, Duane da Rocha, Melquia­des Alvarez, Konrad Czerni­ak...

Hainbat traba
Tolosa, Pontevedran jokatu zen Gaz­teen Espainiako Txa­pel­­keta­rako prestatu zen ba­tez ere, eta helburuak bete zituen: brontzea lortzea eta Opene­rako sailkatzea. Ope­ne­rako izan duen bost asteko tartean forma mantentzea besterik ezin izan dutela egin azaldu dute klubetik. Horrez gain, asteazkenetik Malagan izanda, igandera bitarteko egunetan lehiatu gabe egoteak ere ez ziola askorik lagundu nabarmendu dute.

Udarari begira entrenatzen
Orain, udarari begira entrenatzea da Tolosaren asmoa, Udarako Txapelketa Absolu­turako gutxienekoak bai baititu. Klubetik gaineratu du­te­nez, bere kategoriakoa (ju­nior mailakoa) eta absolutua bi astetako tartearekin izango dira eta biak prestatzeko aukera gehiago izango dute. Datorren astean jada, Tolosa Panticosan izango da bere taldekideekin entrenatzen.