Dora Ekna Parker Hernanin bizi den ghanarra da eta EAEko Ghanako lagunen elkarteko kidea da. Orain dela gutxi, Gipuzkoa mailako elkartea jarri dute martxan eta elkartearen berri zabaltzeko asmoz, Ghanako independentziaren aldeko eguna antolatu dute gaur. «Gure asmoa, gure herria eta Gipuzkoa eta Hernaniren arteko harremana indartzea da», dio Dora Ekna Parkerrek.
Hori horrela, egunean zehar ekintza ezberdinak antolatu dituzte: 11:00etan futbol partidua izango da Zubipen, Gipuzkoan eta Bizkaian bizi diren ghanarrek jokatuko dute elkarren aurka; 13:30etan Ghanari buruzko azalpenak emango dituzte Atsegindegin eta bertako jolasak ezagutzeko eta bazkaltzeko aukera ere izango da; bukatzeko, 16:30etan txaranga aterako da Atsegindegitik. Plaza Berritik pasa eta Gudarien plazaraino joango da giroa jartzen. Bizkaian bizi diren Ghanako herritarrek joko dute bertako musika.
«Jendeak Ghana ezagutzea nahi dut»
Gipuzkoako Ghanako Lagunen elkartea oso berria da. EAE mailakoak Bizkaian dauka egoitza, Durangon, eta bertan Dorak azaldu zien Gipuzkoa mailako elkartea sortu nahi zuela. Amherren laguntzarekin eta SOS-Arrazakeriarekin Donostian hasi zen pixkanaka lanean eta orain zabaltzen ari da.
«Ghana eta Ghanako herritarrak ezagutzea nahi dut. Beti Afrikako herrialde berdinetaz hitz egiten da eta horiek ezagutzen ditu jendeak, Maroko esaterako, eta nik jendea animatu nahi dut Ghana ezagutzera. Euskadi eta Ghanaren arteko elkartasuna da gure lema», dio Ekna Parkerrek.
Herrialde lasaia
Ghana Afrikako mendebaldean dagoen herrialdea da eta itsasoa dauka. Herrialdea 9 eskualdetan banatua dago eta bakoitzak bere hizkuntza dauka. Denetan ingelesa irakasten da (Britainiako kolonia izan baitzen) eta horrez gain, eskualde bakoitzean, bertako hizkuntza. «Ni Cape Coast-ekoa naiz, Erdialdeko Ghana eskualdeko hiriburua da eta hango hizkuntza fante da», azaldu du Ekna Parkerrek.
Ghanako bizimoduaz galdetuta, Ekna Parkerrek azaldu du 20 bat urtetan egoera ekonomikoa ez dela oso ona izan, baina azken urteetan hobetzen doala. «Europatik jende asko hasi da joaten eta enpresak jarri dituzte martxan». Merkatua ere asko aldatu omen da txinatarrek ere negozioak jarri dituztelako.
«Gizarteari dagokionez, hango jendea oso lasaia da, ez da inoiz gerrarik izan. Bi triburen arteko liskar txiki bat, baina besterik ez», gaineratu du.
Ghanako 6 herritar, Hernanin
Ekna Parkerrek ia lau urte daramazki Hernanin bizitzen eta oso gustora dagoela dio. «Hemengo jendeak asko lagundu dit integratzen. Amher elkarteak, esaterako, hasieratik eman dit babesa eta elkarteko kideak oso ondo portatu dira nerekin». Hernanin, 6 ghanatar bizi dira. «Hernanin ez gara asko bizi, baina Gipuzkoa osoan lagun asko gara. Andoain, Irun, Beasain, Tolosa, Donostia... Gipuzkoa guztian asko gara eta bertan izango dira gaur».
Independentzia,
1957ko martxoaren 6an
Independentziaren aldeko eguna gaur ospatuko bada ere, Ghanak martxoaren 6an lortu zuen Britainiatik independizatzea. Ghana, independentzia lortu zuen lehenengo kolonia afrikarra izan zen.
EGITARAUA:
11:00etan, futbol partidua Zubipen. Gipuzkoa vs Bizkaia.
13:30etan, hitzaldia, jolasak eta bazkaria Atsegindegin.
16:30etan, txaranga Kaxkoan barrena, Atsegindegitik aterata.