Xabier eta Karajito protagonistatzat hartuta, haurrei zuzendutako 12 ipuin argitaratu dituzte Amaia Fernandez eta Maria Agirre hernaniarrek. Aurkezpena astelehenean egin zuten Donostiako Fnac-en. Ipuinak, Fernandezek eta Agirrek sortutako Parazito markarekin argitaratu dituzte. Argitaletxea, berriz, Kaneta izan da. Egileek Kronikari azaldu diotenez, ipuinak didaktikoak dira, fantasia ukituarekin. «Datu errealak ematen dira abenturazko eta fantasiazko istorioen bidez. Modu dibertigarrian ikasteko aukera dute haurrek. Gainera, oso koloretsuak dira eta testu aldetik tipografia erraza dute». 12 ipuinak lau bildumatan banatuta daude eta bilduma bakoitzak gai bat lantzen du: ingurugiroa, zientzia, aiton-amonak...
Jarraitzeko asmoa
Fernandez eta Agirrek argazkilaritza estudio bat dute eta haurrak bezero nagusienak izaki, ipuinak idaztea eta marraztea pentsatu zuten. 2009an kaleratu zituzten lehenengo hiru ipuinak, Durangoko Azokari begira. Joxan Ormazabalen laguntza izan zuten. Itzultzaile lanetan ere aritu zen. Hil zenean, Aztiri Itzulpenakekin hasi ziren lanean.
Ordutik 9 ipuin gehiago argitaratu dituzte eta azaldu dutenez, jarraitzeko asmoa dute: «Pozik gaude erantzunarekin. Pixkanaka-pixkanaka goaz, baina gure editoreak dio ondo doala, funtzionatzen duela eta Xabier eta Karajitorekin jarraitu egin behar dugula. Motel goaz dirurik ez daukagulako publizitatea egin eta ezagutzera emateko, baina gustora gaude».
Don Kremallerra, laster
Xabier eta Karajitoren abenturak alde batera utzi gabe, ipuin berriak sortzen ari dira Don Kremallerra protagonista berriarekin. Hala ere, oraindik ez dakite noiz argitaratuko duten lehenengo ipuina. Aurreratu dutenez, ez du zerikusirik izango aurreko proiektuarekin. «Don Kremallerra bihurri bihurria da eta gauza ezberdinetan bihurtzen da. Ipuin motxagoak izango dira, oso bisualak eta koloretsuak, haurrek errazago irakurri ahal izateko. Abenturak kontatuko dira, besterik gabe. Deberdina izango da».
Liburudendetan, salgai
Ipuinak liburudendetan erosi daitezke eta liburutegian eta ikastetxeetan ere badaude. Baita Fnac-en ere.
Ipuinak eta Xabier eta Karajito ezagutzeko, Facebook-en jarraitu daitezke Xabier Parazito eta Karajito Parazito jarrita edo www.parazito.com helbidean.
12 ipuinak:
Baobab handia (eus)
Itsasoko abentura (eus)
Izarren bila (eus)
Mamerta armiarma (eus+gaz)
Txokolategilea eta
Txokola sorgina (eus+gaz)
Haritz magikoa (eus+gaz+ing)
Itzal misteriotsuak (eus+gaz+ing)
Txolo eta saguzarrak (eus+gaz+ing)
Munduan barrena Tedekin (eus+gaz+ing)
Zirkoko abentura (eus+gaz+ing+fr)
Munstro beldurtiak (eus+gaz+ing+fr)
Zanponttoak (eus+gaz+ing+fr)