«Galduta edo abandonatuta dagoen txakur edo katuren baten berri izanez gero, udaltzainek deitu egiten digute eta bertara joaten gara. Herriko edozein lekutara joateko prest egoten gara animalia hori jasotzera», azaldu dio Kronikari Jon Azpirotz, Igeldoko txakur eta katuen etxeko zuzendariak. Gipuzkoako 9 herritako Udalekin ari dira elkarlanean galdutako animalien gestioa eramateko. Iaztik, baita Hernaniko Udalarekin ere. «Iaz hasi ginen elkarlanean, batez ere Osiñaga auzoan zentratuta, eta denera 117 katu eta txakur bildu ditugu», dio Azpirotzek.
Gutxiago sakrifikatzearen alde, lanean
Zentruko zuzendariak prozesuaren azalpenak eman ditu: «Animalia behin gure egoitzan dagoenean, katuentzako edo txakurrentzako txabola `Chenil´ batean uzten dugu bazkari eta ur freskoarekin. Barruko eta kanpoko parasitoak kentzen zaizkio. Ondoren, albaitariak aztertzen du. Mikrotxipa duen begiratzen dugu eta baldin badauka jabeari deitzen diogu. Mikrotxipik ez baldin badu, hemen geratzen da. Gu arduratzen gara animaliaz. Nolakoa den aztertzen dugu eta izaeraren fitxa egiten diogu. Izen bat jartzen diogu eta 30 egun pasa ondoren, adopzioan emateko martxan jartzen gara».
Azpirotzek azpimarratu du, Gipuzkoan ahalik eta animalia gehien adopzioan ematearen alde ari direla lanean eta ahalik gutxien sakrifikatzea lortu nahi dutela: «horretarako beste gestio bat daramagu, modernoagoa». Animaliak sakrifikatu, beste erremediorik ez dagoenean bakarrik egiten dute: «Bakarrik, gaixo dauden edo burua ondo ez duten animaliak hiltzen ditugu eutanasiaren bidez, animaliek sufritu gabe. Protokoloak agintzen duen bezala, albaitaria arduratzen da horretaz. Eta gorputza, hozgailu haundi batean jartzen da, ondoren errausteko».
Zerbitzu integrala
«Jendeari laguntzeko gaude. Galdutako animaliak berreskuratzen laguntzen dugu eta abandonatutako animaliak adopzio arduratsuan ematen ditugu», gaineratu du Azpirotzek. «Eskaintzen dugu hurbiltasuna, esperientzia, prestutasuna... zerbitzu integrala». Izan ere, Igeldoko zentrua, txakur eta katuen ostatua ere bada eta jabeek bertan uzteko aukera dute. «Zaintza egokia ematen diegu. Animalien beharrei begiratzen diegu: kirola egiten dute, jostailuak dauzkate...».
Aste Santuan mugimendu gehixeago izan ohi da, baina batez ere, Eguberrietan izaten da eskari gehiago. Hernaniarrek erabiltzen dituzte bertako zerbitzuak eta baita Aranoko zenbaitzuk ere.
Horiez gain, beste zerbitzu batzuk ere eskaintzen dituzte: txakurren heziketa eta trebakuntza, hitzaldiak ematen dituzte, ezinduei laguntzen dieten txakurren erakustaldiak eskaintzen dituzte... Informazio gehiago: www.igeldoresidenciacanina.com edo 943 24 01 22.
Oporretan, animalia
gehiago utzi
Opor inguruan animalia gehiago uzteko joera dagoen galdetuta, Azpirotzek dio hala dela zoritxarrez eta batez ere udan izaten dela joera gehiago. «Kontzientziazio soziala behar da eta animaliak ezin dira edozein modutan eta edozeini saldu edo eman. Administrazioak esku hartu behar du. Alemanian, esaterako, beste kontzientzia bat dute eta hemengo txakur asko adoptatzen dituzte».
Pixkanaka zabaltzen
Igeldoko txakur eta katuen etxea 2008an jarri zuten martxan eta egun, Gipuzkoako 9 herritara iristen dira. Azpirotzek azpimarratu du pixkanaka zabaltzen doazela, baina sistema ez dela justua Gipuzkoako Animalien Babesetxeak duen laguntzarekin konparatuta: «Gipuzkoan bildutako animalien artetik %30-35 guk bildu ditugu. Zenbait animalia adopzioan eman arte hilabeteak pasatzen dira eta defizitarioa da. Dena dela, Diputazioarekin ari gara negoziatzen».
Unai Cabrera, ‘Cocodrilo Dundee’ hernaniarra
Igeldoko zentruan, Azpirotzez gain, beste bi langile dabiltza eta horietako bat hernaniarra da: Unai Cabrera. Esku ona du animaliak harrapatzen eta Urnieta aldean Cocodrilo Dundee deitzen omen diote. Hirugarrena, Marcos Villen albaitaria da.
Hernaniko datuak
2011 urtea
Bildutako animaliak: 107
- 57 txakur
- 50 katu
Itzulitako animaliak: 33
Adoptatutako animaliak: 52
Sakrifikatutako animaliak: 12
Adoptatzeko zain: 10
2012 urteko lehenengo hiruhilekoa
Bildutako animaliak: 10
- 9 txakur
- 1 katu
Itzulitako animaliak: 7
Adoptatutako animaliak: 2
Adoptatzeko zain: 1 (katua)