extremadurako familia ugari etorri ziren Hernanira eta Euskal Herrira 60-70garren hamarkada inguruan. Ia guztiak errotu dira hemen, baina lotura haundia izaten jarraitzen dute jaioterriarekin. Urtero itzultzen dira euren edo familiartekoen etxeetara. Urtea luzea da ordea, eta hemen pasatzen dituzten hilabeteetan, Extremadura gertu sentitu nahi dute askok. Eta hori bakarrik ez, euren lagun, bizilagun eta herritarrei ere, erakutsi nahi dizkiete hango gastronomia, kultura... Hori horrela, Donostiako Extremadurako Elkarteak Jardunaldiak antolatzen ditu Hernanin, Donostian eta beste hainbat herritan. Hernanin gaur eta bihar izango dira. 20garren edizioa da aurtengoa, eta ohi bezala, igandea izango da egun haundia.
Bideoa eta poesia errezitaldia, gaur
Extremadura ezagutzen ez dutenek, edo bertako paraje, herri eta txokoak gogoratu nahi dituztenek, gaur dute aukera. Guztia izango da ikusgai, arratsaldeko 19:30etan jarriko baitute Biterin Extremadurari buruzko bideoa. Ondoren, poesia errezitaldia egingo dute.
Gastronomiak, erakusketak, dantza ikuskizunak...
Biharkoa izango da jardunaldietako egun haundia. Goizeko 10:00etan hasita, Extremadurako gastronomiaren erakusketa izango da Atsegindegin; eta ikusi bakarrik ez, erosteko aukera ere izango da: urdaiazpikoa, txorizoa, gozoak, edariak... Las Hurdesetako eta Guadalupeko esku langileek egindako produktuak ere egongo dira ikusgai, eta erosgai. Eta Extremadura bisitatu nahi duenarentzat, liburu eta publizitate postua ere, jarriko dute. Azkenik Virgen de Guadalupe dantza taldearen emanaldia izango da. Goiz eta arratsalde dantzatuko dute; bi kasuetan, Atsegindegin: 13:00etan eta 17:30etan.