Plenoa izan zen astearte arratsaldean Udalean. 8 puntu bozkatu zituzten: ohiko ebazpenenak, tasen inguruko bi puntu, eskualde mailako hitzarmen bat, eta hiru mozio. Kronikak, Lan Erreformaren inguruko bi mozioak azalduko ditu hurrengo lerroetan, eta gainerako puntuak, larunbateko Kronikan landuko ditu.
Bildu eta PSE-EEren mozioak, onartuta
Bilduk aurkeztutako mozioa onartu zen Gobernu Taldearen, EAJ-PNVren eta H1!en aldeko botoekin; PSE-EE abstenitu egin zen. Bilduk mozioan dio, PPk onartutako Lan Erreforma langileen kontrako eraso bortitza dela, eta langile kopurua igotzeko aitzakiarekin, erreformaren asmo bakarra ezkutatzen dela: murrizketak egitea soldatetan eta kaleratzeagatik ordaindu beharrekoan. Hori horrela onartu zuten: «1. Udalak Lan Erreforma salatu nahi du. Langileengan utzi nahi dutelako enpresa-kudeaketa eskasa eta ekonomia-eredu okerra. 2. Udalak eskatzen dio Espainiako Gobernuari Erreforma lehenbailehen indargabetzea. 3. Udalak Lan Harremanen Euskal Esparrua indartzea eskatzen du, euskal herritarrek izan dezaten lan-merkatua arautzeko aukera».
Alderdi Sozialistaren mozioa berriz, PSE-EE, EAJ-PNV eta H1!en aldeko botoekin onartu zen eta Bildu abstenitu egin zen. Bertan ondorengo bi puntuak onartu ziren: «1. Plenoak erabat gaitzesten du Espainiako Gobernuak onartutako Lan Erreforma. Atzera pauso bat da, ez da justua eta ez ditu lanpostu gehiago sortuko. Gainera, lana suntsituko du eta lan baldintzak okertuko ditu. 2. Konbenio kolektiboa bertan behera uztea negoziazio kolektiboaren kontrako eraso bat da. Kontuan izan behar da negoziazio hauen bidez ezartzen direla lan baldintza asko».