Greba Orokorra deitu zuten atzo Hego Euskal Herrian zortzi sindikatuk, Rajoyren gobernuak otsailean onartu zuen Lan Erreformaren kontra: ELA, LAB, STEE-EILAS, ESK, EHNE eta HIRU sindikatuek alde batetik, eta CCOO eta UGT sindikatuek, bestetik.
Lanuztea aspaldiko haundiena izan zen Hernanin, ia erabatekoa: erdiguneko komertzio guztiek itxi zuten. Baita ere, kate haundiek: Lidl, Dia, Eroski... Erakunde publikoek bat egin zuten grebarekin, eta Udalak eta anbulatorioak zerbitzu minimoak eman zituzten; autobus zerbitzuek ere, gauza bera egin zuten. Herriko industriaguneetan, jarraipena zabala izan zen, enpresa haundi ia guztiek itxi baitzuten: Zikuñagako Papelera, AMR, Orona, UBIS, Celulosas Hernani...
Sindikatuek balorazio positiboa egin zuten jarraipena erabatekoa izan zela azalduz. Buruntzaldean, Urbil eta Iparlat itxi izana azpimarratu zuten, besteak beste. Mobilizazioak ere deitu zituzten goizean hiriburuetan eta arratsaldean herrietan, eta milaka pertsonek egin zuten bat deialdiekin.
Sindikatuak: «azken 20 urteetako haundiena»
Gipuzkoan eta Hego Euskal Herri guztian jarraipena ia erabatekoa izan zen sindikatuen arabera: «arrakastatsua izan da, azken 20 urteetan egin den haundiena». Batez ere, industrian egindako jarraipena azpimarratu zuten, Mercedes eta Michelin bezalako enpresa haundiek itxi zutela gogoratuta.
Bestalde, Eusko Jaurlaritzaren datuen arabera, greba %71,90ek egin zuten. Sektoreak azpimarratuz, jarraipena batez ere Administrazioan, Hezkuntzan eta Justizian izan zela gaineratu zuten. Sektore pribatuari dagokionean, jarraipena %60-70ekoa izan zela azaldu zuten.
Rajoyren gobernua:
«ez dugu atzera egingo»
Greba Orokorra deitua zegoen espainiar estatuan ere. Rajoyren gobernuak ordea, argi utzi zuen bereari eutsiko diotela eta Lan Erreformak ez duela atzera bueltarik: «Lanean jarraituko dugu egungo 5.300.000 langabetuek lana izan dezaten».