Plenoa izango da gaur Udalean. Zortzi puntu izango dituzte aztergai, bigarren solairuko Pleno Aretoan, 19:00etan hasita; tartean, Musika Eskolaren inguruko tasak. Horren harira, eta azalpenak emateko asmoarekin, prentsa oharra bidali du Udalak.
2012-2013rako tasetan, orokorrean, KPIa igotzea aurreikusi dutela azaldu dute. Hernani Musika Eskola Publikoari dagokionean ordea, orekatze beharra ikusi du Udalak. Oharrean azaldu dutenez, Musika Eskola eratu zenean, finantziazio eredua adostu zuten hiruren artean: Eusko Jaurlaritzaren Hezkuntza Saila, Udala eta erabiltzaileak. Gaur egungo egoera ordea, hasierako konpromezu horretatik guztiz aldendu dela diote: «Udalak bere gain har-tzen du %60a eta Eusko Jaurlaritzaren dirulaguntzak murriztu egin dira. Hori horrela, Musika Eskolaren bideragarritasuna bermatzeko asmoarekin, tasak eguneratzea eta egokitzea beharrezkoa da».
Oharrean diote, Eskola Kontseiluak (Musika Eskolako zuzendaritza, Udala eta ikasle eta gurasoen ordezkaritzak) landu duela gaia modu partehartzailean, eta adostu dituztela tasen igoeraren irizpideak eta proposamenak.
Bestalde, jakinarazi dute Udalak eta Musika Eskolako zuzendaritzak bilera egingo dutela apirila bukaeran, Musika Eskolako ikasle eta erabiltzaileei aldaketak jakinarazteko.
Mozioa, Plenoan
Eguneko beste puntuetako bat da, Langilen plazarik gabe geratu diren haurren gurasoek sartu duten mozioa. Kaltetuei eta herritarrei Plenora joateko deia egin diete.