Langile ikastolan plazarik gabe geratu dira 20 haur eta haien gurasoek kontzentrazioa egingo dute asteartean 12:30etan Donostian, Hezkuntza Delegaritza aurrean (Andia kalea). Izan ere, egun horretan aurkeztuko dituzte zerrenda definitiboak. Gurasoek hala azaldu dute: «Aurten ere azken urteetako egoera errepikatu dela eta, herriko hainbat haurrek ezin izango dute gurasoek erabakitako hezkuntza ereduan ikasi. Euskal eskola euskaldun, publiko, laiko eta kalitatezkoa hautatu dugun arren, aukeratutako ikstetxetik kanpo geratu dira gure haurrak, eta hauetako 6 hezkuntza sistematik kanpo geratu dira.
Aurten arazoa jasatea guri egokitu bazaigu ere, ez da arazo pertsonala, ezta puntuala ere. Hernaniko herriak azken urteetan jasaten duen arazoa da eta, konponbiderik eman ezean, etorkizunean ere jasan beharko duena».
Mozioa, astearteko Plenoan
Arazoa herri mailakoa dela diote eta indarrak biltzen ari dira behin betiko konponbidea emateko: «Hernanin belaunaldi guztiak bizi eta hezteko irtenbide duin baten alde». Udalaren babesa badute, ELA eta LAB sindikatuena ere bai eta herritarren sinadurak biltzen ari dira taberna eta komertzioetan, asteartean Delegaritzan aurkezteko. Horrez gain, mozio bat sartu dute Udalean eta astearteko Plenoan aztertuko da. Bertara joateko dei ere egin dute. Arratsaldeko 19:00etan izango da.