Euskal Herri osotik gerturatutako txistulariek hartu dute parte gaur, Txistulari Gazteen Txapelketan. Bihar berriz, Hernani eta inguruko txistulariak elkartuko dira herrian. Hernani Musika Eskolak Hernaniko VIIIgarren Txistulari Jaialdia antolatu du asteburuan, eta bi horiek dira, ekitaldi nagusiak.
37 bakarlari eta 10 talde
Inoiz baino gaztetxo gehiagok eman dute izena aurten, VIII. Txistulari Gazteen Txapelketan. Goiz eta arratsalde jokatuko da, gaur, Milagrosan: goizean, bakarka lehiatuko dira; eta arratsaldean, taldeka.
Goizeko saioa 11:30etan hasiko da, eta 37 bakarlari ariko dira txistua eta danbolina jotzen. 13 urtetik beherakoen kategorian, 16 lagunek hartuko dute parte; eta 13-16 urte bitarteko kategorian, 21ek.
Arratsaldeko saioari dagokionean, 10 taldek hartuko dute parte, guztiak 9 eta 16 urte bitartekoak. Guztira, 65 txistulari eta atabaltari elkartuko dira, Milagrosan.
Txapelketan parte hartuko duten txistulari guztiak Euskal Herriko hainbat txokoetatik etorriko dira; zehazki, herri hauetatik: Agurain, Atarrabia, Azpeitia, Bera, Berriozar, Bilbo, Doneztebe, Donostia, Durango, Ezkirotz, Gasteiz, Hernani, Irun, Iruñea, Pasaia, Tafalla, Zestoa eta Zizur Txiki.
Sagardoi, Busselo eta Olano, epaimahaian
Txistu txapelketak prestigio haundiko hiru epaile izango ditu gaurkoan: Iñaki Sagardoi, Ixiar Busselo eta Maiteder Olano. Sagardoi txistu ikasketak egiten ari da Iruñeako Goi Mailako Musika Kontserbatorioan, eta 2008an irabazi zuen Hernaniko Txistulari Gazteen Txapelketa. Ixiar Busselok Donostiako Kontserbatorioan egin zituen txistu ikasketak eta Errenteriako Musika Eskolako txistu irakaslea da. Azkenik, Maiteder Olanok, Bilboko J.C. Arriaga kontserbatorioan burutu zituen txistu ikasketak, eta Gernikako Musika Eskolako txistu irakaslea da.
21 txapel, 7 urtetan
Momentuz jokatu diren 7 txapelketan 21 txapel banatu dira. Gehienak, 6, Iruñeara. Iruneko txistulariek 4 irabazi dituzte, Donostiakoek 3, Azpeitiakoek 2, Gasteizkoek 2, Hernanikoek 2, Lizarrakoek 1 eta Bilbokoek beste 1.
Txistulariak bihar,
kaleetan barrena
Txapelketa atzean utzita, Hernani eta inguruko txistulariek Topaketa egingo dute bihar. Donostia, Lasarte, Pasaia eta beste hainbat herritatik etorriko dira, elkartu eta Hernaniko kaleak alaitzera. Eguna 10:00etan hasiko dute, Kaxkoan zehar diana elkarrekin jotzen. Ondoren, ttun-ttuna joko dute Plaza Berrin, herritarrak dantzan jartzeko asmoarekin (txarra egingo balu, Arkupetan). Arratsalderako indarrak berreskuratzeko asmoarekin, bazkaltzera joango dira guztiak elkarrekin, Santa Barbara elkartera (aldez aurretik eman behar zen izena).
Arratsaldean, kalejiran ibiliko dira, herrian barrena. Eta hala, txistu doinuak zabalduz, agurtuko dute eguna eta Txistulari Jaialdia.
EGITARAUA:
Martxoak 24, gaur
Txistulari Gazteen Txapelketa
11:30etan, Milagrosan:
- A (12 urte arteko bakarlariak) eta B (13-16 urte bitarteko
bakarlariak) kategoriak.
17:00etan, Milagrosan:
- D kategoria (taldeak) eta sari banaketa.
Martxoak 25, bihar
Txistulari Topaketa
10:00etan, elkartzea eta diana.
12:30etan, ttun-ttuna Plaza Berrin. Kalejira eta dantzarako
doinuak (eguraldi txarrarekin,
udaletxeko Arkupetan).
14:00etan, bazkaria.
18:00etan, kalejirak herriko kale eta plazatan.