Hernaniko Ezker Aber-tzalea, Gazte Independentistak, Ikasle Abertzaleak, Txoko Feminista eta LAB sindikatuko ordezkariek martxoaren 29ko Greba Orokorrarekin bat egin dute, «lan erreforma salatzeko, baina bereziki krisi ekonomikoaren aitzakian hartzen ari diren neurri krudelen aurrean, euskal langileriaren eskubideak defendatzeko». Halaxe azaldu zuten asteazkenean, prentsaurrean. Greba aurreko egunetan hainbat ekimen izango direla gaineratu zuten eta grebaz gain, ekimen horietan parte hartzeko dei ere egiten diete herritarrei. Gaur, esaterako, bi hitzaldi eta manifestazioa izango dira.
Enpresariaren mesedetan
Prentsaurrean hainbat arrazoi eman zituzten erreformaren aurka kalera ateratzeko: «Enpresariek langileak errazago eta merkeago kaleratu ahal izango dituzte; espedienteak ez dira lan agintaritzatik pasako eta erabakia enpresariaren esku geratuko da; formazio kontratua deritzona erabiliz langile bati 33 urte bete arte 500 euroko soldata ordaintzeko aukera izango du; jardunaldi partzialeko kontratuak egin ahal izango dituzte, langileak aparteko orduak egitera behartuz eta jardunaldi osoa betearaziz; ekintzaileei laguntzeko kontratuaren bidez, lehenengo urtean kaleratzea librea eta ordaingabekoa izango da...».
Preso eta iheslarien aldeko kontzentraziorik ez
Hernaniko preso eta iheslari politikoen senideek gaurko manifestazioarekin bat egingo dute eta ez da kontzentraziorik izango.
EKINTZAK ETA DEIALDIAK
Gaur - Mobilizazio eguna:
11:00etan, hitzaldia Institutuan.
18:30etan, hitzaldia Kontrakantxan.
20:00etan, manifestazioa Plazatik.
Martxoak 28:
19:30etan, hitzaldia udaletxean Floren Aoizen eskutik: ‘Gure esku, zure esku: independentzia’. Natzak antolatua.
Martxoak 29 - Greba Orokorra:
11:30etan, herrialdeko manifestazioa Anoetako estadiotik abiatuta.
18:00etan, manifestazioa Plazatik.