Hernani, Andoain, Lasarte eta Usurbilgo gazte mugimenduek Jalgi Hadi Garaipenera! Buruntza taldea sortu dute. Bi helburu ditu: «eskualdeko gazteen arteko harremana bultzatzea eta Gaztelak Nafarroako erresuma konkistatu zuenetik 500 urte beteko direla eta, Euskal Herri mailan sortu den mugimenduari eskua luzatzea».
Hori horrela, herri bakoitzean ekintza ezberdinak antolatu dituzte aste honetan zehar. Hernanin, esaterako, Gipuzkoaren jatorriari buruzko dokumentala eskainiko dute gaur, 19:30etan. Bihar, 19:30etan, hitzaldia emango dute herriko gazteek. Eta ostiralean, afari merienda eta Gartxot ipuinaren interpretazioa izango dira 20:30etan. Ekintza guztiak Gaztetxean izango dira.
Larunbatean, Amaiurrera
Ekintza nagusia larunbatean izango da. Amaiurrera irteera antolatu dute lau herrietako gazteek. Autobusean joango dira. Usurbiletik 10:00etan aterako da eta Hernanitik, Atsegindegitik, 10:15etan pasako da. Garinen dago izena emateko zerrenda.
Amaiurrera, 11:00ak aldera iristeko asmoa dute. Bertan batailaren berri emango dute gaztelua zenaren inguruan. Ondoren, Elizondora joan eta bertako gazteekin bilduko dira. Bazkaldu ondoren, bost herrien arteko harremana sendotzeko asmoz, kantu saio bat eta joku erraldoi bat egingo dute kultura eta historiaren inguruko ezagutza praktikan jarriz.
Sustraiak lantzen
Aste osoan zehar eta Amaiurren, Euskal Herriaren eta herritarren sustraiak landuko dituzte. Hala azaldu dute: «Gure sustraiak deuseztea helburu duten agintariek beren helburua geroz eta gertuago ikusi dezakete gu ez bagara kontziente gure sustraiak non dauden». «Zu zeu nondik zatozen jakin nahi duzu edo denari uko eginda bizi, edonoren menpe, inongo arrazoirik izan gabe bere aurka joateko?». «Hurbil zaitez gugana eta jalgi hadi garaipenera denon artean garaipena hurbilago ikusiko baitugu».
EGITARAUA:
Gaur
19:30etan, ‘Gipuzkoaren
jatorria’ dokumentala Gaztetxean.
Bihar
19:30etan, hitzaldia herriko gazteen eskutik Gaztetxean.
Ostirala
20:30etan, afari merienda eta Gartxot ipuinaren
interpretazioa Gaztetxean.
Larunbata
Amaiur-elizondora irteera
10:15etan, autobusa Atsegindegin.
11:30etan, hamaiketakoa muxutruk.
12:00etan, azalpen-ekitaldia.
12:30etan, trikipoteoa.
14:00etan, bazkaria
(norberaren esku).
Segidan, jolasak, argazkia...