Orain arte Hernani’n Musik ekimenean eskainitako emanaldiekin konparatuta, saio benetan berezia izango da ostiralekoa. Zinea eta musika uztartuko dira. Hain zuzen, Faust pelikula mutua proiektatzen den bitartean, The Silent Band taldeak zuzeneko musika eskainiko du. Emanaldia 20:00etan izango da Biterin eta sarrerak salgai daude dagoeneko Biterin bertan, 7 euroan.
Faust filma, F. W. Murnau zinemagile haundiarena da eta ahotsik gabeko zinearen lan preziatuenetakoa da. Eskainiko den bertsioa, Luciano Berriatuak egindako ikerketa lanaren emaitza da. The Silent Band 1999an sortu zuen Javier Perez de Azpeitiak film mutuak musikaz janzteko helburuarekin. Nazioarteko zenbait jaialditan parte hartu du taldeak, Toronton eta Bolonian, besteak beste, eta Europan barrena bira arrakastatsuak egin ditu.