Zipri Otxandorenak batuta jaso, eta klik! argazkia. Atzo jende asko inguratu zen Tilosetara, Kronikak deituta, argazkia ateratzera. Kronikak liburua kaleratzekoa du, epe motzean, eta liburu horren azalerako argazkia atera nahi zuen, herriko talde eta pertsonak bertan zirela.
Nagore Legarretak atera zuen argazkia, 6 urtez Kronikako kazetari izanak. Atzean, hernaniarrak; talde eta banakako. Eta tartean, Zipri Otxandorena, zuzendariaren batuta eskutan zuela.
Izan ere, batutak badu zer ikusia Kronikak aterako duen liburuarekin. Batutak, eta musikak; erritmoak. Kazetariak erritmoarekin idatzi behar du. Hori da, behintzat, Kronikaren ondorioa, 12 urtez Hernaniko albisteak idazten pasa eta gero.
Hiztunetik ahalik eta gertuen dagoen euskera
Jexux Eizagirrek idatzi du liburua, hainbeste urtean Kronikaren laguntzaile izan denak. Kronikako albisteak oinarri hartuta, Eizagirrek lan haundia egin du, adibideak bilatzen, eta teorizatzen. Funtsean, hiztunetik ahalik eta gertuen dagoen euskera; hori da kazetariak egin beharko lukeena. Irakurraldi batean ulertzeko moduko euskera, graziarekin idatzia, eta monotoniatik urruti dagoena.
Monotoniari nola ihes egin? Esaldia nola ordenatu? Aditza non eta nola jarri? Kontu horiek eta gehiago idatzi dituzte, argazkiz eta adibidez jantziak. Kronikaren 12 urteko jarduna eta idazteko modua biltzen dituen liburua: Erritmoa, kazetariaren batuta.